Maxhoranca, pro zgjedhjes së kryeprokurorit të ri. PD: Mos e acaroni klimën politike!

Komisioni i Ligjeve është mbledhur këtë të enjte për të diskutuar për përfundimin e mandatit të kryeprokurorit Adriatik Llalla dhe zgjedhjen e kryeprokurorit të ri. Mbledhja e komisionit është shoqëruar me debate. Ndërkohë që mazhoranca ka hapur procedurat për zgjedhjen e kryeprokurorit të ri, opozita e ka akuzuar për acarimin e klimës politike në vend.

Pjesë nga diskutimi

Ulsi Manja: Komisioni i Ligjeve sot do të vendosë çeljen e procedurave për miratimin, përcaktimin e prokurorit të Përgjithshëm të përkohshëm sipas kritereve të përcaktuara në ligj.

Bledi Cuci: Komisioni i ligjeve pasi u njoh me memon e sekretarit të Përgjithshëm të Kuvendit, pasi konstatoi se Këshilli i Lartë i Prokurorisë nuk është konstituar ende, pasi u njoh me memon e Shërbimit të Monitorimit, pjesë e Kuvendit, vendosi: 1. Miratimin e procedurës së prokurorit të përgjithshëm të përkohshëm. A) komisioni i ligjeve fton prokurorët me më shumë eksperiencë nga radhët e prokurorëve që brenda 5 ditëve të depozitojnë një CV të kandidatit. B) menjëherë pas depozitimit të listës, komisioni përgjegjës bën publikimin e saj dhe cakton datën për zhvillimin e seancës. C) pas zhvillimit të seancës komisioni i ligjeve shqyrton dokumentacionin dhe harton raportin për seancën plenare. D) Kuvendi voton për caktimin e Prokurorit të Përgjithshëm të përkohshëm.

Genc Gjonçaj (sekretar i përgjithshëm i Kuvendit): Në asnjë rast ne nuk kemi thënë që kuorumi për zgjedhjen e Prokurorit kërkon 84 vota. Kjo është për tu qartësuar. Ajo që keni në tryezë ka të bëjë vetëm me dy memo: e para ka të bëjë me konstatimin e vakancës së prokurorit të Përgjithshëm. Ne nuk vlerësojmë nëse Prokurori i Përkohshëm duhet të zgjidhet me 84, 71 apo 16 vota. Jeni ju që do orientoni Kuvendin. Memo e dytë ka të bëjë me faktin e moskrijimit të KLP-së.

Enkelejd Alibeaj: Interesi i medieve dhe publikut tregon se diçka e pazakontë po ndodh. Ju po filloni procedurën për të emëruar prokurorin e përgjithshëm të Shqipërisë. Kjo nuk është tentativë, por është fakt që maxhoranca po kërkon të kapë Prokurorin e Përgjithshëm. Kushdo e kupton këtë. Ju mund të keni probleme personale me Adriatik Llallën, por kam përshtypjen se mund të keni më shumë probleme me dosjet që Adriatik Llalla po çon përpara. Ftesa ime është që ti thërrasim arsyes dhe të pozicionohemi jo përkundrejt një individi, por që ti thërrasim arsyes. Ftesa është edhe politike sepse në qoftë se do të hidhni këtë hap të gabuar kushtetues dhe mbi të gjitha politik, do të acaroni klimën politike në vend, kur nuk ka arsye për ta bërë./L.P./Dritare.net

Behu i pari për te komentuar

Lini një koment

Adresa juaj e-mail nuk do te publikohet.


*