Eksperti amerikan paralajmëron: Kanabisi dëmton trurin e të rinjve. Pasojat mund të mos rikuperohen kurrë!
E Shtunë 19 Korrik 2025, 10:10
Dritare.net
Përdorimi rekreativ i kanabisit është bërë gjithnjë e më i zakonshëm vitet e fundit, por studimet tregojnë se ndikimet në shëndetin e trupit dhe veçanërisht të trurit mund të jenë të rënda.
Një studim i fundit ka sugjeruar se përdorimi i kanabisit rrit rrezikun për infarkt dhe goditje në tru më shumë se kokaina, ndërsa një studim kanadez ka gjetur lidhje mes përdorimit të kanabisit dhe rritjes së rrezikut për demencë tek të moshuarit që kanë përfunduar në spital për shkak të tij.
Në një intervistë për Fox News psikiatri dhe specialisti i trurit Dr. Daniel Amen themelues i klinikave Amen Clinics në Kaliforni konfirmoi se është e qartë që përdoruesit e marihuanës kanë qarkullim më të ulët të gjakut në tru, bazuar në dekada të tëra të imazherisë së trurit që ai ka analizuar në klinikat e tij.Këto zbulime mbështeten edhe nga studime të tjera të fundit, që kanë lidhur përdorimin e kanabisit me sëmundje të zemrës dhe dëmtime të tjera.
“Na është gënjyer se marihuana është e padëmshme, se është një ilaç i mirë,” – tha Amen. “Mund të ndihmojë disa persona, por tek adoleshentët dhe të rinjtë në të njëzetat, rrit rrezikun për ankth, depresion, vetëvrasje dhe psikozë.”
Ai theksoi gjithashtu se në një studim të ri që krahasoi përdoruesit e cigareve me ata të marihuanës, kanabisi shkaktoi më shumë dëme në mushkëri sesa duhani.
Një nga “tendencat më shqetësuese” që ka vënë re, sipas Amen, është se disa prindër e konsumojnë kanabisin bashkë me fëmijët e tyre adoleshentë apo të rritur, gjë që ai e sheh si një rrugë shumë të gabuar për shoqërinë.
Ai theksoi se ndonëse disa njerëz mund të argumentojnë se alkooli është më i dëmshëm, në të vërtetë “asnjëri prej tyre nuk është i mirë për ty”.
“Pse do të doje të konsumosh diçka që e plak trurin më shpejt sesa vetja jote po plaket?” – pyet ai.
Dr. Amen paralajmëroi se truri i të rinjve nuk përfundon zhvillimin deri në moshën 25–26 vjeç, dhe konsumimi i marihuanës para kësaj moshe mund të pengojë zhvillimin normal, duke lënë pasoja të përhershme në shëndetin mendor.
“Kur fillon të përdorësh marihuanë, alkool apo droga të tjera në moshë të re, zhvillimi yt mendor ndalet,” – shtoi ai.
“Shumë të rinj nuk e kuptojnë sa i rëndësishëm është truri i tyre kur janë 17, 18, 21 apo 23 vjeç sepse truri nuk përfundon zhvillimin e tij deri në rreth 25 apo 26 vjeç. Dhe nëse e dëmton atë herët, ndoshta nuk arrin kurrë të rikuperohet.”-/E.P-dritare.net
