Irani sulmon me dronë aeroportin e Kuvajtit, 1 i vdekur dhe mbi 60 të plagosur
E Mërkurë 3 Qershor 2026, 17:05
Dritare.net
Një person ka humbur jetën dhe më shumë se 60 të tjerë janë plagosur pas sulmeve me dronë iranianë në aeroportin ndërkombëtar të Kuvajtit, sipas autoriteteve lokale.
Ministria e Mbrojtjes e Kuvajtit e cilësoi sulmin si “agresion kriminal iranian”, ndërsa Ministria e Jashtme njoftoi se janë dëmtuar edhe disa misione diplomatike në vend.
Sulmi është marrë përsipër nga Garda Revolucionare e Iranit (IRGC), e cila tha se ishte hakmarrje ndaj sulmeve amerikane në një tanker nafte iranian dhe në ishullin Qeshm, si dhe për objektiva amerikane në rajonin e Gjirit.
Sipas Shteteve të Bashkuara, forcat amerikane kanë kryer më herët sulme “vetëmbrojtëse” ndaj Iranit dhe kanë rrëzuar disa dronë dhe raketa të lëshuara drejt Kuvajtit dhe Bahreinit.
Viktima e vetme e konfirmuar është një shtetas indian, ndërsa disa të tjerë nga India janë mes të plagosurve, sipas Ministrisë së Jashtme të Indisë, e cila dënoi sulmin dhe bëri thirrje për ndalimin e menjëhershëm të përshkallëzimit.
Pas ngjarjes, Kuvajti dëboi dy diplomatë iranianë dhe thirri përfaqësuesin diplomatik të Teheranit, ndërsa situata në rajon mbetet e tensionuar mes SHBA-së dhe Iranit./K.C/dritare.net
