Rubio: Irani ende ka mijëra dronë, kërcënimi nuk ka marrë fund
E Martë 2 Qershor 2026, 21:09
Dritare.net
Sekretari amerikan i Shtetit, Marco Rubio, deklaroi se pavarësisht goditjeve të fundit ushtarake, Irani vazhdon të ketë një arsenal të konsiderueshëm dronësh, duke e cilësuar këtë si një sfidë globale për shkak të kostos së ulët dhe lehtësisë së prodhimit të tyre.
Duke folur para Komitetit të Senatit për Marrëdhëniet me Jashtë, Rubio tha se operacionet ushtarake të SHBA-së kanë dobësuar ndjeshëm kapacitetet mbrojtëse të Iranit. Sipas tij, ajo që ai e quajti “mburoja konvencionale” e Teheranit, e bazuar te raketat dhe dronët për mbrojtjen e programit bërthamor, është dëmtuar rëndë, ndërsa bllokada amerikane ndaj porteve iraniane po i shkakton vendit humbje prej qindra milionë dollarësh në ditë.
Rubio theksoi se negociatat për programin bërthamor iranian do të jenë komplekse dhe mund të zgjasin disa muaj. Ai tha se Teherani duhet të angazhohet për bisedime mbi rezervat e uraniumit të pasuruar dhe kufizime afatgjata të aktivitetit të pasurimit bërthamor. Sipas tij, hapi i parë do të ishte rihapja e Ngushticës së Hormuzit dhe garantimi i lundrimit të lirë për anijet.
Kryediplomati amerikan deklaroi gjithashtu se beson se lideri suprem i Iranit, Ajatollah Mojtaba Khamenei, është gjallë dhe po merr pjesë gjithnjë e më shumë në drejtimin e vendit, pavarësisht mungesës së tij në publik pas sulmeve që vranë babanë e tij dhe disa drejtues të lartë ushtarakë.
Në të njëjtën kohë, Rubio akuzoi Iranin se po përpiqet të pengojë përpjekjet diplomatike mes Izraelit dhe Libanit. Ai tha se SHBA-ja po punon me qeverinë libaneze për të avancuar bisedimet, ndërsa Teherani kërkon të ndikojë në proces për të marrë meritat në rast të një marrëveshjeje të ardhshme. Rubio nënvizoi se një nga sfidat kryesore mbetet dobësimi i Hezbollahut dhe forcimi i institucioneve shtetërore të Libanit./dritare.net
