Zelensky letër Putinit: Të flasim ballë për ballë! Si përgjigjet presidenti rus
E Premte 5 Qershor 2026, 08:08
Dritare.net
Presidenti ukrainas, Volodymyr Zelensky, i ka bërë thirrje presidentit rus, Vladimir Putin, për një takim të drejtpërdrejtë mes tyre, në një përpjekje të re për t’i dhënë fund luftës.
Në një letër të hapur drejtuar Putinit, Zelensky tha se do të ishte “gabim të pritej thjesht” derisa lufta në Evropë të rikthehet në qendër të vëmendjes së Shteteve të Bashkuara. Sipas tij, paqja mund të arrihet vetëm përmes dialogut të drejtpërdrejtë midis Ukrainës dhe Rusisë.
Ai kërkoi gjithashtu një armëpushim të plotë gjatë zhvillimit të negociatave të propozuara, por Putini e hodhi poshtë këtë ide të enjten.
Presidenti amerikan, Donald Trump, deklaroi se do të ishte “shumë mirë” nëse dy liderët do të takoheshin. Ndërkohë, Kremlini konfirmoi se e kishte marrë letrën dhe se Putini do të informohej për përmbajtjen e saj.
Letra e Zelensky-t kishte një ton sfidues dhe herë-herë ironik, duke përmendur edhe sulmet e fundit ukrainase në territorin rus. Ai shkroi se “pas 26 vitesh në pushtet, mosha po fillon të ndikojë te Putini”.
Në letër, Zelensky i bëri një ftesë të drejtpërdrejtë Putinit:
“Ukraina propozon t’i japë fund kësaj lufte përmes angazhimit të drejtpërdrejtë mes nesh. Po propozoj një takim.”
Kremlini u përgjigj se Zelensky është i mirëpritur të takohet me Putinin në Moskë.
Zelensky theksoi gjithashtu se SHBA-ja është aktualisht shumë e përqendruar te situata me Iranin dhe se nuk duhet pritur derisa lufta në Ukrainë të rikthehet në fokusin kryesor amerikan.
Nga ana e tij, Putini deklaroi se është “i gatshëm dhe i përkushtuar për të arritur një marrëveshje me Ukrainën”, por shtoi se do të nevojiten kompromise.
Qëndrimi i kahershëm i Rusisë mbetet që Ukraina të tërhiqet nga katër rajone pjesërisht ose kryesisht të pushtuara nga forcat ruse: Donetsk, Luhansk, Kherson dhe Zaporizhzhia, si dhe të heqë dorë nga synimi për t’u anëtarësuar në NATO.
Ukraina e ka refuzuar kategorikisht dorëzimin e territoreve, duke argumentuar se kjo do ta inkurajonte Rusinë të niste pushtime të tjera në të ardhmen.
Negociatat për armëpushim kanë ngecur muajt e fundit, ndërsa përpjekjet e mëparshme për paqe në Geneva, Abu Dhabi dhe Istanbul nuk kanë sjellë rezultat konkret./K.C/dritare.net
