Shportën e Babagjyshit, ta sjell Mrizi i Zanave, drejt e në shtëpi
E Shtunë 12 Dhjetor 2020, 10:10
Dritare.net
Ciklin e Shqiptarëve të Mrekullueshëm këtë vit e nisëm me Altinin e Mrizit, djalin e artë që solli agroturizmin në Shqipëri. Sepse Mrizi do të jetë gjithmonë një zgjedhje e mirë, për ta nisur dhe mbyllur vitin. Por nëse këtë fundvit nuk mund të shkosh atje, mos e ki aspak merak, vjen Mrizi te ti. Do të të kujtohet Mrizi përmes aromës së gjalpit, që ndonëse do ta konsumosh në shtëpi, do të ngjasojë sikur je atje, te vendi që perëndimi s’ndodh kund të jetë më i bukur.
Shija e lëngut të shegës do të të kujtojë mirëseardhjen e atij djalit që të sajdis me violinë. Nëse të mungon tavolina e mrekullueshme e Mrizit, krijojë atë natën e festave në shtëpinë tënde.
Ashtu, thjeshtë e shijshëm. Me djathë, me gjalpë, pastërma, shegë, kunguj, verë, raki, vaj, komposto, reçel.
Ndërsa Vitin e Ri, nise me një lugë mjaltë që të të shkojë gjithë viti ëmbël.
Sigurisht çdo produkt i Mrizit është 100 % bio, madje edhe vetë shporta është e bërë me dorë, nga duarartët e Zadrimës, që janë kaq të shumtë në numër. Dhe me një shportë të tillë, ti mund të ndihmosh disa prej tyre./dritare.net
