Amerikanët më pak të shqetësuar për sjelljen e mirë tek fëmijët, ja çfarë kanë prioritet!
E Martë 19 Shtator 2023, 08:08
Dritare.net
Të kesh fëmijë të sjellshëm shpesh është një shqetësim për prindërit, por jo të gjithë të rriturit në çdo vend mendojnë se kjo është një nga gjërat më të rëndësishme.
Në përgjithësi, të rriturit në SHBA kanë më pak gjasa të pohojnë se të pasurit fëmijë të sjellshëm është një cilësi veçanërisht e rëndësishme, ku vetëm 52% e tyre e pohuan këtë në vitin 2017, sipas një raporti të publikuar këtë muaj nga King’s College London. Kjo e bën SHBA-në vendin më pak të mundshëm, nga 24 vendet e anketuara në vitet e fundit, për të besuar se sjelljet e mira janë vendimtare për fëmijët. Kjo është një rënie e konsiderueshme nga viti 1990, kur 76% e të rriturve amerikanë pohonin se sjellja ishte një cilësi shumë e rëndësishme për fëmijët që e zotëronin, tregojnë të dhënat. Është gjithashtu një kontrast i fortë me vendin kryesor, Egjiptin, ku 96% e të anketuarve thanë se sjelljet e mira duhet të jenë prioriteti kryesor i prindërimit. Nigeria vjen në vendin e dytë me 89%, e ndjekur nga Maroku me 88%. Por edhe në Mbretëria e Bashkuar e cila listohet në vendin e gjashtë, prindërit pohuan se sjelljet e mira ishin çelësi, citon CNBC.
Raporti i King’s College në Londër, i titulluar “Prioritetet e prindërimit, qëndrimet ndërkombëtare ndaj rritjes së fëmijëve”, përdor të dhëna nga një prej anketave më të mëdha sociale në botë, Anketa e Vlerave Botërore. Raporti bazohet në grupet e të dhënave më të fundit të disponueshme për secilin vend të cilat u grumbulluan nga Anketa e Vlerave Botërore, gjatë vitit 2017-2022.
Një faktor tjetër i rëndësishëm që listohet pas idesë së sjelljes së mirë tek fëmijët, është nëse ata dëgjojnë prindërit e tyre ose të rriturit e tjerë. Po ashtu edhe në këtë pyetje, të pakët ishin ata amerikanë të cilët pohuan se bindja ishte një cilësi kryesore për fëmijët. Në fakt, ajo mbeti shumë prapa në të gjitha vendet krahasuar me sjelljet e mira.
Vendi që vlerëson më shumë bindjen është Nigeria me 58%, e ndjekur nga Meksika dhe Egjipti me përkatësisht 57% dhe 56%. SHBA bie në gjysmën e dytë të tabelës me 21%. Por vendi që kujdeset më pak për bindjen, ishte Japonia, ku vetëm 3% e të rriturve pohuan se bindja ishte një cilësi shumë e rëndësishme për fëmijët.
Rëndësia e bindjes ka rënë në shumë vende perëndimore që nga viti 1990.
“Për shembull, si në SHBA ashtu edhe në Australi, pjesa e qytetarëve që mendon se kjo veçori është veçanërisht e rëndësishme është përgjysmuar. Në të parën, ai ra nga 39% në 1990 në 21% në 2017, dhe në të dytin ra nga një kulm prej 39% në 19% midis 2005 dhe 2018”, theksohet në raport.
Përtej sjelljes së mirë
Sondazhi nuk mbulon vetëm cilësitë që e bëjnë një fëmijë të sillet mirë. Atribute të tilla si imagjinata; të kesh tolerancë dhe respekt për të tjerët; dhe punëtor ishin pyetjet që u listuan në anketë. Një total prej 11 cilësish janë renditur në raportin e King’s College në Londër. SHBA renditet në top 10 për katër prej tyre, duke treguar se është ndër vendet që vlerësojnë më shumë pavarësinë dhe punën e palodhur nga fëmijët. Puna e palodhur është një prej tyre, ku 68% të të rriturve në SHBA thonë se është e rëndësishme për fëmijët. Kjo është përqindja e gjashtë më e lartë në 24 vendet e anketuara dhe kategoria ku SHBA zë vendin më të lartë në renditje. Polonia kryeson tabelën me 81%, e ndjekur nga Rusia me 76%. Nga ana tjetër, vendet nordike duket se u kushtojnë pak vlerë fëmijëve që punojnë shumë, vetëm 19% e norvegjezëve dhe 8% e suedezëve thanë se ishte vendimtare, gjë që i vendos ata në fund të renditjes.
Kategoria e dytë ku SHBA bën pjesë në top 10 është pavarësia. Nga të anketuarit, 56% thanë se ishte një cilësi veçanërisht e rëndësishme për fëmijët, duke e vendosur SHBA-në në vendin e shtatë në këtë renditje. Vendi që rankohet më lart është Norvegjia me 85%, ndërsa Egjipti është i fundit me 14%. SHBA renditet gjithashtu në top 10 për imagjinatën, pasi 30% e të anketuarve e shohin atë si një atribut shumë të vlefshëm dhe besimin fetar, i cili shihet si shumë i rëndësishëm nga 32% e të anketuarve. Kjo e vendos SHBA-në në vendin e shtatë dhe të dhjetë për renditjen përkatëse. Cilësia që më së shpeshti është cilësuar si veçanërisht e rëndësishme në anketë është toleranca dhe respekti për njerëzit e tjerë. Nga të anketuarit, 71% në SHBA thanë se ishte një atribut kryesor që fëmijët duhet të kishin, i cili renditet në pozicionin e 11-të.
Suedia dhe Norvegjia kryesojnë këtë renditje me përkatësisht 93% dhe 90%, ndërsa Irani renditet i fundit me 40%./M.K-dritare.net
