
Pse Lin 3 është dëshmia më e madhe e lashtësisë në Evropë! Flet arkeologu!
Dritare.net
Rezultatet e gërmimeve mbi 4-vjeçare të arkeologëve shqiptarë dhe atyre nga Universiteti i Bernës kanë konfirmuar se vendbanimi palafit i Linit në Pogradec është më i vjetri në Europë, mbi 8500-vjeçar. jë e dhënë e rëndësishme historike jo vetëm për Shqipërinë por mbarë Evropën. Kërkimet për të nisën 10 vite më parë nga ekipi i arkeologjisë nënujore në Institutin e Arkeologjisë. Instituti i Arkeologjisë dhe Universiteti i Bernës, filluan kërkimet në disa sondazhe brenda dhe jashtë liqenit, ku u identifikua dhe prezenca e palafiteve.
Adrian Anastasi, arkeologu nënujor dhe drejtuesi i projektit shqiptaro-zviceran LIN 3, tregoi për gazetaren Rudina Xhunga në vlogun realizuar nga Dritare TV se si në një periudhë 4-vjecare arritën të gjenin provat dhe të vërtetonin shkencërisht, që vendbanimi më i vjetër në Europë, ndodhet në Pogradec.
“Po flasim për fillesat e vendbanimeve në palafite. Është e vërtetuar shkencërisht me prova që Lin 3 është siti arkeologjik, me vendbanimet më të hershme në Evropë. Bëhet fjalë për ndërtimet në palafite, ndërtesa të veçanta që bëheshin mbi ujë. Lin 3 është një sipërfaqe gati 3500 metra katrorë dhe nuk duhet të imagjinojmë se kjo sipërfaqe ka qenë e banuar përnjëherësh e gjithë kjo sipërfaqe. Po flasim për një numër të pacaktuar vendbanimesh.
Përgjigjet e para shkencore Instituti i Arkeologjisë për Lin 3 i ka marrë në vitin 2017. Dinim që ishin diku në harkun kohor mes Neolitit të Hershëm dhe Neolitin e Vonë. Më pas bënë një testim me një palafit me palën zvicerane, arritëm të shkonim në vitet 5600 para krishti.
Nuk po flasim për një vendbanim, po flasim për një sërë vendbanimesh dhe një periudhë kohore tejet të gjatë, 2 mijë vjeçare.
Kjo e bën Lin 3, vendbanimin më të vjetër në Europë. Padyshim që ky është një zbulim i madh që i shërben të shkuarës dhe të ardhmes sonë dhe shkencës në vetvete.
Ky projekt i madh që zhvillon pala zvicerane, përveç bashkëpunimit me palën shqiptare, shtrihet edhe në Greqisë, në liqenin e Kosturit, ku edhe atje është një vendbanim ku deri para se të zbulohej Lin 3 konsiderohej më i vjetri në Evropë. Tani u konfirmua që është Lini! Ky është ndërtim nga më të hershmit në Evropë.
Po flasim për një periudhë rreth 2 mijë vjeçare që në këtë zonë është ndërtuar vazhdimisht.
Nga rezultatet që ne kemi marrë për kronologjinë e këtij vendbanimi, tregon që është i njëkohshëm edhe me vendbanimin në Liqenin e Kosturit, por edhe me Dunavecin, por edhe me një vendbanim në Pogradec. Dhe për t’i zbërthyer të gjitha këto vendbanime, çelësi është Lin 3.
Është pjesë e historisë së njerëzimit që ka jetuar në këtë territor. Nuk kemi periudha shkëputjeje, ndaj këto troje janë jetuar që prej këtyre viteve deri në ditët e sotme”, u shpreh zoti Anastasi në Dritare TV./L.F-dritare.net

















