Pse quhet “Bujtina Çupa”? Historia pas emrit të një vendi mikpritës në Klos!
E Mërkurë 30 Korrik 2025, 13:01
Dritare.net
Në zemër të Klosit, mes natyrës së egër dhe qetësisë së maleve, ndodhet një bujtinë që ka marrë emrin “Çupa”. Por përse pikërisht ky emër?
Inesa Çupa, e cila drejton bujtinën bashkë me burrin dhe vjehrrin, është një prej zërave më të dashur të ruajtjes së traditës vendase. Ajo e lidh këtë emër me trashëgiminë e familjes së saj.
"Çupa’ nuk është vetëm mbiemri im. Është simbol i një vajze që zgjedh të kthehet, të ndërtojë dhe të ruajë identitetin.", thotë Inesa në DritareTv.
Bujtina Çupa është më shumë se një vend ku hahet e flihet. Është një derë e hapur për turistët që duan të prekin thelbin e jetës shqiptare, të shijojnë ushqimin tradicional, të dëgjojnë legjenda si ajo e “Urës së Vashës”, dhe të përjetojnë mikpritjen e vërtetë shqiptare.
Emri “Çupa” sot qëndron mbi portën e një bujtine që nuk ngre vetëm çati, por ngre një urë mes brezave, aty ku e kaluara, e tashmja dhe e ardhmja flasin në të njëjtën gjuhë./K.C/dritare.net
