Zbulohet telefon në qelinë e Metës. Fliste me Berishën!
E Enjte 24 Tetor 2024, 13:01
Dritare.net
Berisha: Ilir, si je?
Meta: Burgjet tona më të larta/Dyshekët tanë më të pastra.
Berisha: Aaaa, shumë bukur. Edhe burgjet të kishin mbetur pa i bërë poezi. Më thuaj si po e reciton, duke lëvizur duart.
Meta: Jo doktor, nuk e kam Tedin këtu, nuk e lanë të rrinte me mua, megjithëse u lut shumë i shkreti. Po luaj vetëm njërën dorë.
Berisha: (dëgjohet që i flet Lirisë: Paska lajthitur, mban kukulla pelushi në qeli) Kush është Tedi Ilir, ai arushi i filmave për fëmijë?
Meta: Jo doktor, është ai që hedhim mbi kokat e policëve kur mblidhemi te bashkia.
Berisha: (dëgjohet prapë që i flet Lirisë: Qenka akoma në rregull) Si janë kushtet në burg Ilir?
Meta: Nuk janë keq doktor. Ushqimi është i mirë, vetëm se nuk më lejojnë raki këta policët. Thonë që kur pi, kujtoj se jam Avni Rustemi dhe bëj sikur i gjuaj me pistoletë kur kalojnë në korridor, ose si Vojo Kushi dhe i hidhem sipër krevatit sikur është tanks. Po ti si po ia kalon doktor?
Berisha: Mirë, rehat. Krevat, banja, kuzhinë, tre herë në ditë. Miting pasdite. Në darkë përgatis fjalimin për nesër dhe gjumë. Po e tmerrojmë Edi Ramën, Ilir.
Meta: E vërtetë doktor. Mbeti jashtë shtetit. Vetëm kur vijnë për vizitë këta të huajt vjen në Tiranë.
Berisha: E vërtetë. E pe në datën 23, sa i shkuam në Strasburg, i tha asaj Van Der Leien: Aman hajde takohemi në Tiranë se më kanë zënë pritë.
Meta: Pse nuk i shkuat në Surrel kur bëmë atë mosbindjen civile herën e fundit?
Berisha: Nuk i kishin lënë katundarët e zonës. Nuk keni punë këndej, ju kishin thënë, se filloni na vidhni pulat dhe domatet. Janë të gjithë patronazhistë.
Meta: Doktor, të marr pak më vonë, se po bëjnë apelin e darkës këtu dhe është një gardian nga Vlora që më thotë: Mos më bëj pordhë se këtu jam unë kryeministër.
Berisha: Hajt tung./dritare.net
