Berisha: Rama na ka vjedhur pushtetin në Parlament, shkel ligjin!
E Shtunë 18 Nëntor 2023, 12:12
Dritare.net
Ish-kryeministri Sali Berisha në një bashkëbisedim me ndjekësit në Facebook ka komentuar aksionin opozitar, ku deklaroi se qeveria po i shkel të drejtat demokratëve.
Berisha tha se hetimet e SPAK ndaj tij kanë nisur me urdhër të Edi Ramës duke mos respektuar Kushtetutën. Ndër të tjera tha se pengesa për ngritjen e komisioneve hetimore do të thotë heqja e ‘pushtetit’ të vetëm që ka opozita ndaj qeverisë.
“Natyrisht, sot, çështja më kryesore që unë desha të diskutoj me ju, lidhet me aktet diktatoriale të Edi Ramës, të pashembullta në 32 vite, akte me të cilat Edi Rama konfirmon publikisht vendosjen e diktaturës së bandave në Shqipëri, konfirmon veten një diktator që nuk respekton ligjet, votën, Kushtetutën, që ka përqendruar gjithçka në duart e tij. Këto nuk janë deklarata politike, por të vërteta dramatike, para se gjithash për çdo qytetar shqiptar. Sot, 43 deputetë të opozitës janë angazhuar në një betejë pa kthim në parlament, për faktin më të paimagjinueshëm, sepse Edi Rama ka urdhëruar konfiskimin e të drejtave të tyre themelore politike, të drejta që burojnë nga vota juaj, të drejta të dhëna me Kushtetutë deputetëve, në mënyrë që ata të mund të mbrojnë interesat tuaja.
Duke u mohuar deputetëve të drejtën e procesit legjislativ, të paraqitjes së ligjeve, rezolutave dhe amendamenteve, të cilat sipas Kushtetutës dhe rregullores së parlamentit, duhet të ndjekin një proces normal parlamentar, ai de facto u vendos veton. Edi Rama, jo një herë, por gjatë këtyre dy viteve, ka mohuar 8 komisione hetimore parlamentare. Këto komisione hetimore parlamentare, kanë në epiqendër të hetimit të tyre, Edi Ramën personalisht, familjarët e Edi Ramës, ministrat e Edi Ramës, oligarkët e Edi Ramës. Këto komisione synojnë të paraqesin para shqiptarëve se si Kushtetuta e vendit, thyhet, dhe se si familjarët e Edi Ramës pasurohen në kundërshtim me përcaktimet e Kushtetutës. Në Kushtetutë, familja e ngushtë e deputetit, dhe kjo nënkupton bashkëshorten, prindërit dhe fëmijët, nuk lejohet të sigurojnë asnjë të ardhur tjetër përveç rrogës, nga sektori publik qendror apo vendor”, shprehet Berisha./M.K-dritar.net
