Anëtarësimi në BE është çështje mbarëkombëtare
E Diel 24 Maj 2026, 11:11
Dritare.net
Nga Vasil Merko, Gjermani
Procesi i integrimit të Shqipërisë në Bashkimin Europian nuk është thjesht një objektiv politik i një qeverie apo një force të caktuar politike. Ai është një interes kombëtar, një projekt historik dhe një domosdoshmëri për të ardhmen e shqiptarëve kudo që jetojnë. Për këtë arsye, anëtarësimi në BE duhet parë si një çështje mbarëkombëtare, përtej ndarjeve partiake, debateve të vogla ditore dhe mikropolitikës që shpesh na largon nga interesat madhore të vendit. Hyrja në Bashkimin Europian do ta ngrinte Shqipërinë në një nivel tjetër institucional, ekonomik dhe shoqëror. Standardet europiane nënkuptojnë më shumë rend dhe ligj, institucione më funksionale, drejtësi më të fortë, administratë më efikase dhe më shumë garanci për qytetarin e zakonshëm.
Një Shqipëri europiane do të sillte përmirësim të ndjeshëm të cilësisë së jetesës, më shumë investime, më shumë subvencione për bujqësinë, biznesin dhe zhvillimin rajonal, si dhe më shumë siguri ekonomike për familjet shqiptare. Përfitimet nuk kufizohen vetëm brenda kufijve të Shqipërisë. Për mijëra emigrantë shqiptarë që jetojnë prej dekadash në vendet e Bashkimit Europian, sidomos në vende si Greqia apo Italia, integrimi europian hap mundësi reale për njohjen dhe koordinimin e viteve të punës, pensioneve dhe kontributeve që për shumë vite kanë mbetur të paqarta ose rrezikojnë të humbasin. Kjo është një çështje jetike për një brez të tërë shqiptarësh që kanë kontribuar me djersë në ekonomitë europiane. Po aq e rëndësishme është perspektiva që hapet për të rinjtë shqiptarë.
Një Shqipëri në BE do të thotë më shumë mundësi për studime, punësim dhe lëvizje të lirë. Do të thotë fund i shumë barrierave burokratike: viza, leje pune, kufizime administrative dhe pengesa që sot ua vështirësojnë jetën të rinjve tanë. Në të njëjtën kohë, programet europiane, bursat dhe subvencionet do të krijonin horizonte krejtësisht të reja për brezin e ardhshëm. Anëtarësimi në BE ka edhe një dimension kombëtar shumë më të gjerë. Shqipëria, si shtet anëtar, do të kishte zë dhe peshë më të madhe në strukturat europiane për të ngritur dhe mbrojtur çështjet që lidhen me shqiptarët në rajon. Bashkatdhetarët tanë në trojet shqiptare do të kishin një përfaqësim dhe mbështetje më të fortë në kuadër të institucioneve europiane.
Kjo do ta vendoste çështjen shqiptare në një dimension të ri diplomatik dhe politik. Pikërisht për këtë arsye duhet të largohemi nga mentaliteti i konfliktit të përhershëm politik dhe nga interesat e ngushta të ditës. Integrimi europian nuk është projekt i një partie, por i një kombi. Shqipëria ka nevojë për një mobilizim të përbashkët shoqëror, institucional dhe kombëtar. Ka ardhur koha që të gjithë, pa dallim bindjesh politike, të përveshim mëngët dhe të punojmë me një zë për një Shqipëri europiane. Sepse anëtarësimi në Bashkimin Europian nuk është vetëm një destinacion politik — është një investim historik për të ardhmen e kombit shqiptar./dritare.net
