Gazetarja: Ulëritëse që fëmijët po sillen si kriminelë!
E Martë 19 Nëntor 2024, 08:08
Dritare.net
Nga Malvina Tare
Tmerret sociale, nuk kanë fund dhe kur dëgjon lajmet, çdo ditë këto lajme të vijnë si ai laku në fyt, që sa vjen e ngushtohet dhe mezi kapërdihesh. E ndërsa sot një lajm i kobshëm i vrasjes së një fëmije në oborrin e shkollës. Është ulëritëse të mendosh se sot fëmijët po sillen si kriminelë, se pafajësia humbet aq shpejt dhe shoqëria gjendet e papërgatitur në këtë dinamikë sjelljesh të pakontrollueshme.
Degradoi në vrasje, një sherr mes fëmijësh, e ku? Në mes të kryeqytetit, një sjellje, si ato ngjarje që ndodhin në getot e Amerikës. Therëse, ta mendosh që ky është niveli i qytetarisë dhe edukatës brezore që kemi arritur. Mësuesit edukojnë ende sikur përpara kanë veten e tyre fëmijë në bankat e shkollës së diktaturës.
Sot nuk ka më diktaturë, por kjo është e vështirë, sepse duhet të edukojnë menaxhimin e lirisë.
Nuk flitet më njësoj me një adoleshent si përpara '90-ës, nuk flitet më njësoj me adoleshentin që drejtohet nga Tik Tok-u dhe “yjet” e Instagramit. Duhet të mësoni t’i bëni për vete dhe t’u edukoni lirinë dhe të drejtat.
Deri ku shkon e drejta jonë tek tjetri. Ku cenohet morali, ku cenohet jeta. Sot edukuesit duhet të mësojnë dhe edukojnë lirinë. Duhet të shërbejë si një mësim i mirë për të gjithë kjo humbje në mes të kryeqytetit, humbi jeta e një fëmije, në vendin e edukimit.
Sa mëkat e turp për ne./dritare.net
