Kam qenë dhe në Stamboll. Po nuk gjeta si Dhoksati. Flet 94 vjeçari!
E Premte 2 Gusht 2024, 21:09
Dritare.net
Lefter Nerënxa, një banor 94-vjeçar i fshati Dhoksat në Gjirokastër, tregon për Dritare TV, jetën e tij në shtëpinë dyshekullore. Derën ku janë rritur shtatë breza, ai nuk e braktisi kurrë. Një amanet kam tha zoti Nerënxa, që fëmijët dhe nipërit e mi mos ta shëmbin këtë shtëpi.
“Kjo shtëpi është ndërtuar në vitin 1866-ën nga stërgjyshërit e mi. Janë 7 breza në këtë shtëpi dhe amaneti është që mos ta shëmbim kurrë.
Por nipërit e mi, mbase nuk do ta kujtojnë më vonë këtë shtëpi në Dhoksat, ku une linda dhe do vdes. Sa të jenë fëmijët e mi, të paktën kjo shtëpi do të mbahet hapur. Unë nuk u largova kurrë nga Dhoksati, nuk kam parë më mirë askund se këtu. Kam shkuar dhe në Stamboll, kam bredhur dynjanë por si Dhoksati nuk ka. Këtu gjendet ajri i pastër, gjelbërimi, ushqime bio i oborrit tim.
Kam 94 vjet që jetoj në Dhoksat, e dua shumë. Ata që janë larguar, rikthehen, i merr malli kudo që ndodhen. Vite më parë, në Dhoksat bëheshin të gjitha festat, më kryesorja ajo e Lunxhërisë. Nga Dhoksati jam larguar kur shkova ushtar dhe kur punova dy muaj vullnetar, në ndertimin e hekurudhës Durrës-Tiranë.
Tani dal e shkoj shpesh tek fëmijët, por nuk e lëshoj këtë derë. Derë e rëndë dhe e vetmja që dua”, thotë i zoti i shtëpisë përDritareTv, ndërsa zonja e tij shërbën glikotë e shtëpisë./ Dritare.net
