Pse izraelitët nuk e braktisin vendin, edhe kur ka luftë!
E Mërkurë 18 Qershor 2025, 21:09
Dritare.net
Nga Dritare TV
Në botë janë shumë vendet ku njerëzit ikin sapo ndjejnë rrezikun. Ikin për siguri, për të mbrojtur jetën e fëmijëve, për të shpëtuar nga lufta. Është e kuptueshme.
Por ka një vend ku ndodh e kundërta: njerëzit kthehen kur ka luftë.
Izraeli.
Edhe kur rrugët ajrore mbyllen, edhe kur sirenat bien ditë e natë, izraelitët nga mbarë bota gjejnë mënyra për të shkuar në shtëpi. Kthehen nga Evropa, Amerika, Australia. Jo për pushime. Jo për festë. Por për të qenë aty ku duhet, kur vendi i tyre është në rrezik.
Ky nuk është vetëm patriotizëm. Është një ndjenjë më e thellë: ndjenja e shtëpisë si përgjegjësi kolektive.
Në Izrael, shërbimi ushtarak është pjesë e jetës. Çdo qytetar është edhe një mbrojtës i vendit. Edhe kur lëviz larg, ai mbetet i gatshëm për t’u kthyer, sepse nuk e konsideron Izraelin thjesht vendlindje, por vend i premtuar, rezultat i një historie të gjatë përndjekjesh, mbijetese dhe ringritjeje.
Kultura e qëndresës nuk është vetëm në ushtri. Është në rrugë, në shkollë, në familje. Kur shpërthen lufta, nuk dëgjon panik. Dëgjon organizim. Dëgjon mbështetje. Dëgjon “ku mund të ndihmoj?”
Shteti funksionon. Edhe në krizë. Gjen rrugë për t’i sjellë qytetarët e vet në shtëpi, qoftë edhe përmes rrugëve tokësore, përmes vendeve fqinje, apo me ndihmën e miqve ndërkombëtarë. Por më e fortë se çdo mekanizëm është ndjenja e unitetit: një komb i vogël, i rrethuar nga rreziku, por i fortë sepse nuk thyhet nga frika.
Izraelitët nuk e braktisin vendin, sepse e dinë se nëse e braktisin sot, mund të mos e kenë nesër.
Ky është një mësim i heshtur për shumë kombe që sot e shohin atdheun si një vend tranzit, jo si një rrënjë.
Po Shqipëria?
Shqiptarët sot janë më të pranishëm në botë sesa në vendin e tyre. Emigrojnë jo nga lufta, por nga lodhja. Nga zhgënjimi. Nga mungesa e besimit se kjo tokë do t’i mbrojë e do t’u kthejë mundin. Por ndoshta, siç e tregon Izraeli, një komb nuk e ndërton vetëm shteti, as vetëm udheheqësit e tij. Një komb e ndërtojnë njerëzit e zakonshem që nuk ikin, ose që zgjedhin të kthehen!/dritare.net
