Nuk kishte prejardhje ujku!/ Studimi i ri zbulon gjenet që fuqizuan qenin e famshëm Balto!
E Premte 28 Prill 2023, 21:09
Dritare.net
Një studim i ri i mbetjeve taksidermike të një qeni të famshëm siberian, Husky zbuloi ADN-në e veçantë që ndihmoi qenin të fitonte famë ndërkombëtare. Në vitin 1925, Balto udhëhoqi një ekip qensh me slitë në një stuhi dëbore për të shpërndarë ilaçe jetëshpëtuese në një qytet të Alaskës. Përpjekjet e tij heroike u shpërblyen me një statujë të qenit të ulur në Central Park të Nju-Jorkut. Por ndryshe nga ajo që tregon filmi vizatimor Balto i vitit 1995, nuk ishte prejardhja nga ujku që e bëri atë qen kaq të fuqishëm.
Duke krahasuar ADN-në e Baltos me qentë dhe gjitarët e tjerë, studiuesit zbuluan se gjenet e Husky-t siberian e ndihmuan atë t’i mbijetonte udhëtimit të vështirë më mirë sesa do ta kishin përballuar pasardhësit e tij.
Autorët e studimit morën një mostër të ADN-së nga barku i qenit për të rindërtuar gjenet e tij, në Muzeun e Historisë Natyrore në Cleveland, i cili ka mbetjet taksidermike të Baltos. Ata gjithashtu u mbështetën te një grup të dhënash gjenetike të 240 gjitarëve dhe 682 qenve e ujqërve të shekullit të 21-të. Studimi për gjenet nuk dalloi prejardhje nga ujku, thonë autorët e këtij studimi.
Qeni heroik kishte tipare të tjera që e dallonin atë nga Husky-t siberianë të ditëve të sotme dhe qentë e tjerë të slitës të kohës së tij, duke përfshirë një shtat më të vogël dhe një aftësi më të mirë për të tretur niseshtenë, sipas studimit. Studiuesit besojnë se ai vinte nga një popullatë më pak e lindur e qensh Husky, gjë që e bëri atë gjenetikisht më të shëndetshëm dhe më të përshtatshëm për mjedisin ekstrem të Alaskës së viteve 1920. Balto ka lindur në vitin 1919 dhe është importuar nga Siberia. Pronari i tij ishte mbarështuesi norvegjian-amerikan Leonhard Seppala. Në janar 1925, shpërthimi i një infeksioni vdekjeprurës bakterial, difteria, kërcënoi qytetin Nome të Alaskës. Por i vetmi mjekim i disponueshëm ishte në Anchorage dhe i vetmi aeroplan për ta çuar atje nuk nisej për shkak të temperaturave të ulëta. Në rol hynë Balto dhe ekipi i tij i qenve me slitë, të cilët mbajtën ilaçin për 1084 km, ndërsa temperaturat ranë në -31 gradë celsius. Lajmi për udhëtimin historik u përhap shpejt dhe Balto u nderua si personazh në libra e filma komikë dhe për fëmijë, si dhe në një skulpturë në kopshtin zoologjik të fëmijëve në Central Park./K.C/dritare.net
