Plane për plazh këtë fundjavë? Ja si do të jetë moti!
E Premte 21 Qershor 2024, 15:03
Dritare.net
Këtë fundjavë vendi ynë do të vijojë të jetë nën ndikimin e kushteve atmosferike të qëndrueshme për shkak të masave ajrore të nxehta dhe të thata me origjinë nga shkretëtira e Afrikës së Veriut. Megjithatë duke filluar nga dita e nesërme anticikloni afrikan fillon gradualisht tërheqjen e tij duke i lënë vendin masave ajrore më të freskëta dhe relativisht më të lagështa me origjinë veriperëndimore.
Pra, siç u kuptua nga sa më sipër moti parashikohet i kthjellët në të gjithë territorin por pa përjashtuar vranësirat e pakta kalimtare në relievet malore në lindje. Vranësirat në relievet e larta malore të vendit në orët e nxehta të ditës do të shoqërohen me reshje shiu të dobëta dhe lokale.
Temperaturat edhe nesër do të vijojnë të jenë relativisht të larta (vlera deri dhe në 39 gradë celsius) por kjo situatë do të ndryshojë duke nisur nga dita e diel pasi do të ketë rënie të temperaturave.
Ndërsa për ata që do ta kalojnë fundjavën në bregdet era do të jetë pak “problematike” pasi në mesditë deri në orët e pasdites (dhe kryesisht ditën e diel) do të fryjë me shpejtësi mesatare 3-7m/s dhe me rrahje deri në 10m/s dhe drejtim kryesor nga kuadrati i veriut.
Gjithashtu, orët e vona të mbrëmjes të ditës se sotme dhe orët e para të mëngjesit të ditës së shtunë vendi ynë do të përjetoje fenomenin që quhet “net tropikale” me temperatura minimale që nuk zbresin poshtë 26-28 gradë. Temperatura këto që mund të jenë shqetësuese për njerëzit vulnerabil./K.C/dritare.net
