Punime në hekurudhën Durrës–Tiranë, ja ku nuk mund të kaloni sot dhe nesër!
E Enjte 28 Gusht 2025, 17:05
Dritare.net
Policia Bashkiake e Durrësit informoi sot se në kalimin hekurudhor Fusha Sportive, Sukth, qarkullimi rrugor do të jetë totalisht i bllokuar nga të dyja anët për shkak të ndërhyrjeve në infrastrukturën hekurudhore.
Në njoftim shkruhet se drejtuesit e automjeteve të njësisë administrative Sukth, Manëz, Ishëm, të cilët përdorin segmentin rrugor Sukth- Kullë dhe anasjelltas Kullë- Sukth, duhet të dinë se sot dhe nesër nga ora 00:00 deri në 04:00 do të kryhen punime që do të ndalojnë qarkullimin rrugor në kalimin hekurudhor Fusha Sportive, Sukth.
"Njoftohen të gjithë drejtuesit e automjeteve të Njësisë Administrative Sukth, Manëz, Ishëm, të cilët përdorin segmentin rrugor Sukth-Kullë dhe anasjelltas Kullë-Sukth, në kilometrazhin 10+418 se, më datë 28.08.2025 deri më 29.08.2025 nga ora 00:00 deri në 04:00, në kuadër të rikonstruksionit të linjës hekurudhore Durrës–Tiranë Terminali Publik i Transportit (TPT) si dhe ndërtimit të linjës së re hekurudhore drejt Aeroportit Ndërkombëtar të Rinasit (ANR), do të kryhen punime që do të ndikojnë në qarkullimin rrugor në kalimin hekurudhor Fusha Sportive, Sukth."
Policia Bashkiake apelon që qytetarët dhe drejtuesit e mjeteve të shmangin këtë segment rrugor gjatë orareve të përmendura dhe të përdorin rrugë alternative.
Shërbimet e Policisë Bashkiake do të jenë të pranishme në terren për të mbikëqyrur dhe kontrolluar trafikun dhe për të siguruar një qarkullim të sigurt./E.P-dritare.net
