OBSH: Shpërthimi i hantavirusit nuk është fillimi i një pandemie
E Enjte 7 Maj 2026, 17:05
Dritare.net
Organizata Botërore e Shëndetësisë ka qetësuar opinionin publik pas rasteve të fundit me hantavirus në një anije turistike, duke theksuar se situata nuk përbën fillimin e një pandemie të re si Covid-19.
Gjatë një konference për media, drejtori i përgjithshëm i OBSH-së, Tedros Adhanom Ghebreyesus, deklaroi se hantavirusi përhapet “shumë, shumë ndryshe” nga koronavirusi dhe zakonisht kërkon kontakt të zgjatur për transmetim.
Deri tani janë konfirmuar pesë raste nga tetë të dyshuara, ndërsa të gjithë personat e prekur kanë qenë në bordin e së njëjtës anije turistike. OBSH paralajmëron se mund të raportohen edhe raste të tjera, pasi periudha e inkubacionit të virusit mund të zgjasë deri në gjashtë javë, por thekson se rreziku për publikun mbetet i ulët.
Sipas organizatës, kjo vlen edhe për Canary Islands, ku anija po drejtohet aktualisht. Autoritetet shëndetësore po vazhdojnë hetimet për të përcaktuar burimin e saktë të infeksionit dhe kontaktet e pasagjerëve.
OBSH bëri të ditur se çifti që u infektua fillimisht kishte vizituar zona ku ishte e pranishme një specie miu e njohur për bartjen e hantavirusit. Virusi zakonisht transmetohet tek njerëzit përmes kontaktit me urinën, jashtëqitjet ose pështymën e brejtësve të infektuar dhe nuk konsiderohet virus që përhapet lehtësisht nga njeriu te njeriu.
Autoritetet ndërkombëtare kanë bërë thirrje për qetësi, duke theksuar se deri tani nuk ka asnjë tregues për një situatë të ngjashme me pandeminë Covid-19, ndërsa monitorimi i rasteve po vazhdon nga afër./K.C/dritare.net
