Mesazhi i Putinit për Trump-in, një ditë para telefonatës!
E Diel 18 Maj 2025, 15:03
Dritare.net
Presidenti rus Vladimir Putin deklaroi sot se Rusia respekton interesat kombëtare të Shteteve të Bashkuara dhe pret që edhe interesat e saj të trajtohen në të njëjtën mënyrë. Këto komente u bënë në një dokumentar të transmetuar nga kanali televiziv rus "Rossiya", ku Putin u pyet për marrëdhëniet me SHBA-në pas rikthimit të Donald Trump në presidencë.
"Amerikanët, populli amerikan dhe udhëheqja amerikane, përfshirë presidentin, kanë interesat e tyre kombëtare. Ne i respektojmë ato dhe presim që edhe ne të trajtohemi në të njëjtën mënyrë," tha Putin. Ai theksoi se Rusia është e hapur për bashkëpunim dhe dialog me SHBA-në, për sa kohë që ekziston respekt i ndërsjellë për interesat kombëtare.
Në lidhje me luftën në Ukrainë, Putin theksoi se qëllimi i Rusisë është të mbrojë interesat e njerëzve në ato territore ku jetojnë qytetarë që e konsiderojnë rusishten si gjuhën e tyre amtare dhe Rusinë si atdheun e tyre. Ai shtoi se rezultati i luftës duhet të jetë eliminimi i shkaqeve që shkaktuan krizën, krijimi i kushteve për një paqe të qëndrueshme afatgjatë dhe sigurimi i sigurisë së shtetit rus.
Këto deklarata vijnë në prag të një bisede telefonike mes Putin dhe Trump, e cila është paralajmëruar për të hënën. Kjo bisedë pritet të fokusohet në çështje të sigurisë ndërkombëtare dhe marrëdhëniet dypalëshe mes dy vendeve./K.C/dritare.net
