Analisti Arben Meçe ka ofruar një këndvështrim kritik ndaj veprimeve të SPAK në çështjen 'Balluku'. Sipas tij, SPAK po i shmanget qëllimisht ballafaqimit në Parlament, ku do të duhej të paraqiste prova konkrete, duke preferuar të marrë masa më të lehta sigurie që nuk kërkojnë autorizim parlamentar.
'Ajo që po më shqetëson mua është përpjekja e SPAK-ut për të shmangur ballafaqimin e provave,' deklaroi Meçe në Dekalog, Dritare TV, duke argumentuar se nga dosja që është bërë publike, nuk ka asnjë provë që implikon drejtpërdrejt Belinda Ballukun. Ai e cilësoi këtë si një strategji të SPAK për të ndërtuar një gjyq publik dhe politik bazuar në perceptime, pa pasur një bazë të fortë ligjore.
Meçe vuri në dyshim narrativën e një dëmi prej 50 milionë eurosh, duke thënë se nuk e ka gjetur askund në dokumente. Ai akuzoi drejtpërdrejt se SPAK po bashkëpunon me figura të opozitës, si Gazment Bardhi, për të orkestruar këto sulme politike, duke prodhuar një fushatë mediatike përpara se të ketë prova të verifikuara.
I pyetur nëse Belinda Balluku duhej të ishte dorëhequr, Meçe u përgjigj me një 'jo' të prerë, duke argumentuar se në Shqipëri nuk ekziston një precedent i tillë dhe se çdo veprim duhet të bazohet te ligji dhe jo te presioni publik. Ai theksoi se vendimi i Gjykatës së Shkallës së Parë nuk është i formës së prerë dhe se Balluku ka të drejtën e apelimit.
'Kryeministri duhet të presë vendimin final të drejtësisë. Deri atëherë, shkarkimi do të ishte një veprim politik i nxituar,' tha Meçe. Ai kritikoi ashpër atë që e quajti 'gjyq popullor', ku figurat publike dënohen në opinion përpara se drejtësia të ketë folur.
Sipas tij, ky presion mediatik dhe politik, i ushqyer nga vetë SPAK, po minon procesin e rregullt ligjor. Ai mbrojti qëndrimin se kryeministri duhet t'i qëndrojë ligjit, i cili parashikon që masat ekstreme merren vetëm pasi të jenë ezauruar të gjitha shkallët e gjykimit./dritare.net
