Shembet me lëndë plasëse resorti pa leje i ish-kreut të IMT Durrës, Ardian Halili
E Premte 29 Gusht 2025, 16:04
Dritare.net
Një resort luksoz i ndërtuar pa leje në fshatin Shetaj të Ishmit, në Durrës, është shembur ditën e sotme me lëndë plasëse. Objekti, i shtrirë në një sipërfaqe prej rreth 5600 m², ishte ngritur gjatë viteve 2018–2021 nga ish-kreu i Inspektoratit të Mbrojtjes së Territorit (IMT) Durrës, Ardian Halili.
Halili, i cili në atë kohë mbante postin e kryeinspektorit të IMT, u arrestua nga policia e Durrësit dhe pritet të hetohet nga SPAK për tre vepra penale: “Ndërtim i paligjshëm me qëllim përfitimi”, “Korrupsion i zyrtarëve të lartë” dhe “Shpërdorim i detyrës”.
Ish-zyrtari është bashkëshort i ish-prokurores së Durrësit, Rabiana Halili, e cila u dorëhoq pak para procesit të vetingut. Ai është larguar nga Bashkia e Durrësit prej katër vitesh, pas ndryshimeve në drejtimin e institucionit.
Shembja e resortit vjen si pjesë e aksionit kundër ndërtimeve pa leje në zonat bregdetare, ndërkohë që hetimet për aktivitetin e Halilit tashmë do të ndiqen nga Prokuroria e Posaçme (SPAK)./L.F-dritare.net
