SPAK mbyll hetimet dhe dërgon për gjykim Ilir Metën, Monika Kryemadhin dhe 3 të tjerë
E Premte 29 Gusht 2025, 15:03
Dritare.net
Prokuroria e Posaçme (SPAK) ka përfunduar hetimet dhe ka dërguar për gjykim ish-Presidentin Ilir Meta, ish-bashkëshorten e tij Monika Kryemadhi, nënën e saj Fatime Kryemadhi, Pirro Xhixhon dhe Ema Çokun. Hetimi, i nisur në vitin 2019 dhe i bashkuar në një dosje të vetme në vitin 2024, lidhet me aferën CEZ-DIA, kontrata lobimi në SHBA dhe raste të tjera të korrupsionit e pastrimit të parave.
Sipas SPAK, Meta akuzohet për tre raste korrupsioni pasiv, pastrim parash dhe fshehje pasurie, ndërsa Monika Kryemadhi për dy raste korrupsioni, pastrim parash dhe mosdeklarim të pasurisë. Edhe Pirro Xhixho, ish-kreu i AKEP, akuzohet për korrupsion në bashkëpunim, ndërsa Fatime Kryemadhi dhe Ema Çoku për pastrim parash.
Hetimet kanë zbuluar të paktën gjashtë episode korrupsioni e pastrimi parash:
Afera CEZ-DIA, ku Meta si ministër i Energjetikës ka favorizuar kontratën për mbledhjen e borxheve, duke përfituar shuma të konsiderueshme parash.
Ndërhyrje në tregun e fibrave optike në vitin 2014, ku Meta dhe Kryemadhi morën përfitime financiare dhe përdorën karta krediti të padeklaruara, ndërsa Pirro Xhixho lehtësoi procedurat.
Përfitimi i një vile në Tiranë nga një biznesmen, në këmbim të ndryshimeve ligjore e mbështetjes politike.
Kontratat e lobimit në SHBA (2016-2017), ku 463 mijë dollarë nuk u pasqyruan në bilancet e LSI-së.
Blerja e një apartamenti 310 mijë euro në Bllok, ku shuma është paguar cash nga nëna e Kryemadhit, duke shërbyer si mbulesë për pastrim parash.
Shpenzime të padeklaruara mjekësore në vlerën 106 mijë euro gjatë viteve 2013-2019.
SPAK thekson se Meta dhe Kryemadhi kanë përdorur pushtetin dhe influencën politike për të favorizuar biznese kundrejt shpërblimeve monetare, duke përfshirë në këto skema edhe familjarë e bashkëpunëtorë të afërt.
Për këtë hetim, është bashkëpunuar me autoritetet në SHBA, Austri, Itali, San Marino dhe Qipro. Ilir Meta ndodhet në paraburgim që prej tetorit 2024./L.F-dritare.net
