Roland Qafoku: Më kanë vendosur pistoletën në kokë për shkak të një lajmi
Monday 22 June 2026, 09:09
Dritare.net
Në podcastin “Koha për Reflektim” të gazetarit Mikel Kallanxhiu në Dritare TV, gazetari i njohur Roland Qafoku rrëfeu historinë e tij profesionale, sfidat e gazetarisë shqiptare dhe përvojat që kanë shënjuar më shumë se tri dekada karrierë në media.
Qafoku e cilësoi gazetarinë si profesionin më të bukur në botë, duke theksuar se ky është një pasion që nuk njeh orar dhe që kërkon përkushtim të plotë. Ai tregoi se rrugëtimi i tij drejt medias nuk ishte i drejtpërdrejtë. I diplomuar fillimisht në Akademinë Ushtarake “Skënderbej”, ai zgjodhi të ndryshojë rrënjësisht drejtimin e jetës pas viteve ’90, duke ndjekur studimet për gjuhë-letërsi dhe më pas duke hyrë në botën e gazetarisë.
Gjatë bisedës, Qafoku kujtoi emocionin e botimit të parë në shtyp, një moment që e konsideron ndër më të rëndësishmit e jetës së tij profesionale. Ai tregoi se fillimet në gazetën “Koha Jonë” erdhën në një periudhë të trazuar, kur media përballej me presione të forta dhe sfida të mëdha për lirinë e shprehjes.
Një nga momentet më të forta të rrëfimit ishte historia e një kërcënimi të drejtpërdrejtë, kur një oficer policie i vendosi armën në kokë pas publikimit të një lajmi që lidhej me një arrestim për terrorizëm.
“Ka pasur raste që një oficer policie më ka vendosur pistoletën në kokë për shkak të një lajmi që kisha publikuar, por unë kam besuar gjithmonë se gazetari duhet të bëjë punën e tij pa u tërhequr nga presionet apo kërcënimet,” tha Qafoku.
Gazetari foli me mirënjohje edhe për gazetën “Koha Jonë” dhe botuesin Nikoll Lesi, të cilin e konsideroi një figurë me ndikim të madh në historinë e medias shqiptare. Ai ndau gjithashtu historinë e një investigimi të rëndësishëm mbi marrëveshjen e ekstradimit Shqipëri-SHBA të vitit 1933, një zbulim që pati ndikim në debatin institucional të kohës.
Duke reflektuar mbi evolucionin e medias, Qafoku tha se ka qenë dëshmitar i transformimeve më të mëdha teknologjike, nga gazetat e shtypura te interneti, rrjetet sociale dhe platformat digjitale. Sipas tij, megjithëse teknologjia ka ndryshuar mënyrën e informimit, emocionet e gazetarisë së shkruar dhe kënaqësia e publikimit të një lajmi ekskluziv mbeten të pazëvendësueshme.
Në fund të intervistës, ai përcolli një mesazh për brezin e ri të gazetarëve, duke theksuar rëndësinë e pasionit dhe përkushtimit ndaj profesionit.
“Gazetaria nuk është një profesion me orar. Gazetar je 24 orë në ditë. Nëse nuk e ke pasion dhe nuk e ndien natyrshëm këtë mision, një ditë do të largohesh prej tij. Vetëm ata që e duan vërtet mund të mbeten gjatë në këtë profesion,” u shpreh Qafoku.
Intervista solli rrëfime të veçanta nga jeta dhe karriera e gazetarit, duke ofruar një reflektim mbi sfidat, përgjegjësinë dhe evolucionin e medias shqiptare në më shumë se 30 vite tranzicion./L.F-dritare.net
