Palestinezët në Rripin e Gazës kanë festuar lajmin për marrëveshjen e armëpushimit dhe lirimin e pengjeve, por gëzimi i tyre është i përzier me dhimbje pas dy vitesh lufte shkatërruese.
“Kur dëgjuam lajmin për armëpushimin, ndjemë njëkohësisht gëzim dhe pikëllim,” tha për BBC-në 38-vjeçarja Umm Hassan, e cila humbi djalin e saj 16-vjeçar gjatë luftës.
“Të rinjtë dhe të moshuarit filluan të brohorisnin nga gëzimi, por ata që kishin humbur njerëzit e dashur filluan t’i kujtonin ata dhe të pyesnin veten se si do të ktheheshin në shtëpi pa ta.”
Marrëveshja e shpallur nga Presidenti amerikan Donald Trump, e cila pritet të miratohet nga kabineti i sigurisë së Izraelit, parashikon lirimin e 20 pengjeve të gjallë dhe trupave të 28 pengjeve të vrarë, në këmbim të 250 të burgosurve palestinezë që vuajnë dënime të përjetshme dhe 1,700 të paraburgosurve nga Gaza.
Kjo është faza e parë e një plani paqeje me 20 pika, që synon t’i japë fund luftës, ndonëse fazat e tjera ende nuk janë negociuar.
“Ne, civilët, jemi ata që kemi vuajtur më shumë,” tha Daniel Abu Tabeekh, nga kampi i refugjatëve Jabalia.
“Udhëheqësit që jetojnë rehat jashtë vendit nuk kanë asnjë ide për vuajtjet që përjetojmë këtu në Gaza. Nuk kam më shtëpi, kam jetuar në rrugë për më shumë se një vit e gjysmë.”
Izraeli nisi luftën në Gaza pas sulmit të Hamasit më 7 tetor 2023, ku u vranë rreth 1,200 persona, kryesisht civilë izraelitë, dhe 251 u morën peng.
Si kundërpërgjigje, ofensiva izraelite ka shkaktuar vdekjen e mbi 67,000 palestinezëve, shumica civilë, sipas Ministrisë së Shëndetësisë në territorin e kontrolluar nga Hamasi – shifra që OKB-ja i konsideron të besueshme.
Po sipas Kombeve të Bashkuara, mbi 90% e banesave në Gaza janë dëmtuar ose shkatërruar.
“Zoti na shpërbleu për durimin tonë,” tha Umm Nader Kloub nga Gaza veriore, e cila humbi shtatë të afërm gjatë luftës, përfshirë edhe djemtë e saj.
“Me vullnetin e Zotit, shpresojmë që negociatorët të kenë sukses, që ne të kthehemi në shtëpitë tona dhe pengjet e tyre të kthehen të sigurt. Ne nuk duam më luftë.”
Në qendër të Gazës, mjeku Mousa nga Deir al-Balah tha: “Kemi humbur shumë gjatë dy viteve të luftës. Rripi i Gazës është shkatërruar. Na pret ende një kohë e vështirë, por e rëndësishme është që shpresojmë të jemi të sigurt.”
Nga spitali al-Aksa, Dr. Muhammad Rayan i tha BBC Arabic:
“Thellë brenda nesh ndihemi mirënjohës që lufta më në fund ka mbaruar. Por kur kujtojmë britmat, plagët dhe humbjet, thjesht nuk mund të gëzohemi. Lumturia jonë është e përzier me dhimbje.”
Ndërkohë, Husam Zomlot, kreu i misionit palestinez në Mbretërinë e Bashkuar, u shpreh për BBC-në:
“Gjatë dy viteve të fundit, njerëzit tanë kanë humbur familjarë, miq e fqinjë, pa pasur mundësi të vajtojnë. Fokusi i tyre i vetëm ka qenë si të ndalin masakrën. Pas përfundimit të luftës, ndjenja kryesore do të jetë pikëllimi dhe një humbje e thellë shpirtërore, sepse ajo që kemi humbur është e pamatshme.”/E.P-dritare.net
