Ish-prokurori Ervin Karanxha: Pse më shkarkoi Vettingu!
E Mërkurë 24 Dhjetor 2025, 18:06
Dritare.net
Në një intervistë për emisionin Dekalog nga Roland Qafoku në DritareTV, ish-prokurori, Ervin Karanxha ofroi një retrospektivë emocionale dhe profesionale të karrierës së tij 22-vjeçare. Ai veçoi hetimin e rrugës Durrës-Kukës si momentin më krenar, por edhe më frustrues. Së bashku me kolegë të tjerë, ata kishin konstatuar një dëm fillestar prej 230 milionë eurosh, një shumë kolosale për kohën. "Ishte korrupsioni i 20 viteve të mbledhura bashkë.", kujton ai fjalët e kolegut të tij të ndjerë, Vexhi Muçmata. Karanxha tregoi se kishte firmosur marrjen të pandehur të Lulzim Bashës për shpërdorim detyre, por transferimi i çështjes dhe manovrat proceduriale e lanë atë pa një finale gjyqësore të plotë.
Ai ndau edhe anën humane të prokurorit, duke treguar rastin e një qytetari të arrestuar për vjedhjen e një pule në vitin 2005, të cilin e liroi menjëherë, duke kontrastuar varfërinë e skajshme me krimin e madh ekonomik që shpesh mbetet i pandëshkuar. "Të mbash në burg dikë për një pulë, ndërkohë që miliona euro avullojnë, është fytyra e padrejtësisë.", tha ai.
Lidhur me largimin e tij nga sistemi, Karanxha ishte i drejtpërdrejtë dhe kritik. Ai pretendoi se shkarkimi i tij nga Vettingu ishte i parashikuar dhe i bazuar në pretekste absurde, si marrja e një kredie për shtëpi, gjë që u interpretua si paaftësi financiare. Ai shprehu zhgënjimin që reforma, në vend që të pastronte sistemin nga të korruptuarit e vërtetë, shpesh ka goditur profesionistët mbi baza teknike të diskutueshme, duke i zëvendësuar ata me një vakum që sot po rëndon mbi qytetarët. Pavarësisht kësaj, ai theksoi se jeta vazhdon dhe se tashmë po shërben drejtësisë nga ana tjetër e llogores, si avokat./dritare.net
