Ndahet nga jeta “Shemi”, zëri legjendar i grupit “Ilirët”
E Hënë 22 Dhjetor 2025, 22:10
Dritare.net
Këngëtari i njohur nga Kosova, Shemsi Krasniqi, i njohur për publikun si “Shemi”, vokalisti i grupit legjendar “Ilirët”, është gjetur sot i pajetë në banesën e tij rreth orës 15:00. Lajmi për ndarjen e tij nga jeta është konfirmuar nga Policia e Kosovës, ndërsa dyshohet se shkaku i vdekjes ka qenë një atak kardiak.
Shemi u shua në moshën 64-vjeçare, duke lënë pas një trashëgimi të jashtëzakonshme muzikore. Ai konsiderohet një nga zërat më ikonikë të muzikës shqiptare, artisti që i dha jetë dhe shpirt këngës së pavdekshme “Xhamadani vija vija”, e cila me kalimin e viteve u shndërrua në një simbol kombëtar.
Si vokalist i grupit “Ilirët”, Shemi ishte një ndër figurat më të dashura dhe më me ndikim në skenën muzikore shqiptare, duke lënë gjurmë të pashlyeshme në historinë e rock-ut dhe muzikës moderne shqipe. I lindur dhe i rritur në Kosovë, ai u bë i njohur në vitet ’80 si zëri kryesor i këtij formacioni, që shumë shpejt u kthye në simbol të një brezi të tërë.
Në një periudhë kur muzika përfaqësonte jo vetëm art, por edhe identitet, rezistencë dhe shpresë, këngët e interpretuara nga Shemi u bënë himne të rinisë shqiptare. “Xhamadani vija vija” mbetet interpretimi më i paharruar i tij, një këngë që u këndua dhe vazhdon të këndohet në koncerte, festa, tubime dhe ngjarje të rëndësishme kulturore e shoqërore.
Me grupin “Ilirët”, Shemi interpretoi edhe këngë të tjera të njohura si “Fjalët e qiririt”, “Kënga e Naimit”, “Larg vendlindjes”, si dhe shumë krijime të tjera që trajtonin temat e atdhedashurisë, mallit, identitetit dhe shpresës. Muzika e tyre ndërthuri rock-un me elemente folklorike, duke i bërë unikë në skenën shqiptare.
Përtej skenës, Shemi njihej si një artist autentik dhe i lidhur ngushtë me publikun. Ai ishte aktiv edhe në diasporë, ku koncertet e “Ilirëve” bashkonin shqiptarë nga vende të ndryshme të Evropës, duke forcuar lidhjen me kulturën, muzikën dhe gjuhën shqipe.
Ndarja e tij nga jeta lë një boshllëk të madh në artin dhe kulturën shqiptare, por zëri dhe muzika e Shemit do të mbeten të pavdekshme./K.C/dritare.net
