Macron pas takimit me Ramën: Do t’i japim një shtysë të re partneritetit me Shqipërinë
Monday 22 June 2026, 17:05
Dritare.net
Presidenti francez Emmanuel Macron ka reaguar pas takimit me kryeministrin Edi Rama në Paris, duke vlerësuar marrëdhëniet mes Francës dhe Shqipërisë si shumë pozitive dhe duke riafirmuar mbështetjen e Parisit për integrimin europian të vendit. Përmes një postimi në rrjetet sociale, Macron theksoi se bashkëpunimi mes dy vendeve do të marrë një shtysë të re, veçanërisht në fushat e ekonomisë dhe mbrojtjes.
"Mirë se erdhe, i dashur Edi Rama. Dinamika shumë pozitive e marrëdhënieve mes Shqipërisë dhe Francës në fushat e inovacionit, arsimit dhe arsimit të lartë, kulturës dhe turizmit, dëshmon afërsinë mes dy vendeve tona.
Ne duam t’i japim një shtysë të re këtij partneriteti, duke vijuar njëkohësisht forcimin e bashkëpunimit tonë ekonomik dhe në fushën e mbrojtjes.
Franca rikonfirmon mbështetjen e saj për integrimin europian të Shqipërisë dhe për vazhdimin e reformave të nevojshme për të ecur përpara në rrugën e saj drejt Bashkimit Evropian.", shkruan Macron./K.C/dritare.net
