Dhuna ndaj protestuesve në Zvërnec, në pranga roja e sigurisë private, nën hetim 2 të tjerë!
E Diel 31 Maj 2026, 11:11
Dritare.net
Drejtoria e Përgjithshme e Policisë së Shtetit ka nisur një hetim disiplinor ndaj gjithë zinxhirit komandues të Policisë së Vlorës, pas incidentit të ndodhur gjatë protestës në Zvërnec kundër ndërtimit të një resorti turistik, ku u raportua dhunë nga roje private të një kompanie sigurie ndaj qytetarëve protestues.
Sipas njoftimit zyrtar, një punonjës i shoqërisë private të sigurisë “Major Security” është arrestuar, ndërsa dy të tjerë po procedohen penalisht, pasi dyshohen se kanë ushtruar dhunë fizike ndaj një protestuesi, duke e goditur dhe tërhequr me forcë. Ngjarja ka shkaktuar reagim të gjerë publik, veçanërisht për shkak të përdorimit të maskave dhe spray-t lotsjellës gjatë përplasjes.
Njoftimi i Drejtorisë së Përgjithshme e Policisë së Shtetit:
Identifikohet, kapet dhe arrestohet punonjësi i shoqërisë private të sigurisë së kantierit që goditi me grusht shtetasin E. S.
Ndërkohë, nis hetimi disiplinor për të gjithë zinxhirin komandues të DVP Vlorë.
Menjëherë pas publikimit të pamjeve filmike ku shfaqet një punonjës i shoqërisë private të sigurisë duke goditur me grusht shtetasin E. S., Drejtori i Përgjithshëm i Policisë së Shtetit urdhëroi ngritjen e një grupi të posaçëm hetimor për të analizuar dhe hetuar të gjitha veprimet e ndodhura gjatë tubimit të zhvilluar më datë 30.05.2026 nga banorë të fshatit Zvërnec, në vendin e quajtur “Portonovë”.
Në vijim të veprimeve hetimore, u bë identifikimi dhe shoqërimi i punonjësit të shoqërisë private të sigurisë, shtetasit G. B., 32 vjeç, banues në Durrës, i cili, në përfundim të veprimeve të para hetimore, u arrestua në flagrancë, i dyshuar për veprat penale "Heqja e paligjshme e lirisë" dhe "Plagosja e lehtë me dashje".
Ky shtetas ka goditur me grusht shtetasin E. S. dhe më pas, në bashkëpunim me shtetasit A. G. dhe G. V. (të dy të proceduar penalisht), e kanë tërhequr me forcë drejt vendit të rezervuar për rojet, duke i shkaktuar dëmtime të lehta trupore.
Ndërkohë, paralelisht me veprimet hetimore, Drejtori i Përgjithshëm ka urdhëruar Drejtorinë e Standardeve Profesionale në Policinë e Shtetit për nisjen e menjëhershme të hetimit disiplinor për të gjithë zinxhirin komandues të DVP Vlorë, në lidhje me masat dhe menaxhimin e tubimit të zhvilluar ditën e djeshme.
Policia e Shtetit është e vendosur të respektojë të drejtat dhe liritë themelore të qytetarëve, të garantojë sigurinë e jetës dhe të pronës, si dhe të ndëshkojë çdo punonjës policie që neglizhon detyrën apo abuzon me të.
