Izraeli bombardon spitalin në qytetin e Gazës! Grevë në Tel Aviv, bllokohen autostradat!
E Diel 17 Gusht 2025, 10:10
Dritare.net
Teksa Izraeli ka intensifikuar sulmet në Rripin e Gazës, në orët e para të mëngjesit të sotëm u godit spitali Al Ahli në qytetin e Gazës, duke vrarë të paktën 7 persona ndërsa dhjetëra të tjerë janë plagosur, sipas Al Jazeera. Një i ri u vra gjithashtu në një sulm ndaj një tende, gjithashtu në qytetin e Gazës.
Nga ana tjetër, në Izrael mijëra njerëz kanë dalë në rrugët e Tel Avivit që nga ora 06:30 e mëngjesit për të marrë pjesë në grevën e përgjithshme mbarëkombëtare të thirrur nga Forumi i Familjeve të Pengjeve. Ata kërkojnë fundin e luftës në Gaza dhe një marrëveshje për kthimin e pengjeve që mbahen ende nga Hamasi.
Forumi pret që një milion njerëz të mblidhen në Sheshin e Pengjeve të Tel Avivit gjatë gjithë ditës, së bashku me qindra ngjarje në të gjithë Izraelin që përfshijnë dhjetëra mijëra njerëz.
