Tragjedi në Zvicër/ 40 të vdekur dhe mbi 100 të plagosur nga zjarri në bar gjatë festës së Vitit të Ri
E Enjte 1 Janar 2026, 19:07
Dritare.net
Rreth 40 persona kanë humbur jetën dhe 115 të tjerë janë plagosur si pasojë e një zjarri shkatërrimtar që shpërtheu në një bar në Zvicrën jugperëndimore gjatë natës së Vitit të Ri, kanë bërë të ditur autoritetet policore në një konferencë për shtyp.
Zjarri nisi rreth orës 01:30 me orën lokale në barin “Le Constellation”, një lokal i njohur nate ku, sipas një politikani lokal, ndodheshin kryesisht të rinj që festonin ndërrimin e viteve. Paniku u përhap me shpejtësi ndërsa flakët dhe tymi i dendur bllokuan daljet e lokalit.
Sipas autoriteteve shëndetësore, 60 persona po trajtohen aktualisht në spitalin e Sionit, ndërsa dhjetëra të tjerë po marrin ndihmë mjekësore në spitale të ndryshme të rajonit. Një numër i konsiderueshëm i të plagosurve ndodhen në gjendje kritike.
Presidenti i Zvicrës, Guy Parmelin, e ka cilësuar ngjarjen si “një nga tragjeditë më të rënda që ka përjetuar ndonjëherë vendi ynë”, duke shprehur ngushëllime për familjet e viktimave dhe solidaritet me të plagosurit.
Dëshmitarë okularë kanë deklaruar se zjarri mund të jetë shkaktuar nga qirinj ditëlindjeje të vendosur mbi një shishe shampanje, të cilët dyshohet se kanë përfshirë tavanin e lokalit. Megjithatë, Prokurorja e Përgjithshme tha për gazetarët se shkaku i saktë i zjarrit ende nuk mund të konfirmohet, pasi hetimet janë në fazë të hershme.
Një nga të mbijetuarit tregoi momentet dramatike të arratisjes:
“Munda të thyej një dritare. Gjysma e rrobave të mia ishin djegur. Ishte çmenduri,” u shpreh ai.
Autoritetet kanë hapur një hetim penal dhe kanë shpallur ditë zie në nderim të viktimave. Ngjarja ka tronditur mbarë vendin dhe ka ngritur pikëpyetje serioze mbi sigurinë në ambientet e mbyllura të argëtimit./dritare.net
