Kolonel Neziri: Konflikti Izrael-Iran-SHBA do të trondisë Ballkanin!
E Hënë 23 Qershor 2025, 21:09
Dritare.net
Në një analizë të thelluar në Shqip nga Dritan Hila në DritareTV, eksperti ushtarak, kolonel Sami Neziri theksoi se përplasjet mes Izraelit, Iranit dhe Shteteve të Bashkuara të Amerikës në Lindjen e Mesme nuk janë vetëm çështje rajonale, por ndikojnë edhe në stabilitetin e Ballkanit dhe Shqipërisë. Ai theksoi se edhe pse për momentin nuk ka rrezik të drejtpërdrejtë për përfshirje ushtarake në Ballkan, pasiguria politike dhe ekonomike është një realitet që nuk duhet nënvlerësuar.
“Edhe pse nuk ka shenja të menjëhershme për përfshirje ushtarake në rajonin tonë, ne ndjejmë pasiguri politike dhe ekonomike,” tha kolonel Neziri. Ai paralajmëroi se rritja e çmimeve të energjisë si pasojë e tensioneve në Lindjen e Mesme mund të ndikojë direkt në ekonomitë e Ballkanit, duke përfshirë edhe Shqipërinë.
“Shtetet e Ballkanit duhet të përforcojnë dialogun dhe të bashkëpunojnë me partnerët ndërkombëtarë për të shmangur tensionet dhe për të ruajtur stabilitetin,” shtoi ai, duke nënvizuar rëndësinë e mbështetjes nga organizata si NATO dhe Bashkimi Evropian.
Koloneli Neziri paralajmëroi gjithashtu: “Çmimet e naftës dhe gazit mund të rriten ndjeshëm nëse situata përshkallëzohet, gjë që do të rëndojë më tej ekonomitë e vendeve të rajonit.” Ai theksoi se kjo situatë kërkon një angazhim më të madh diplomatik dhe bashkëpunim ndërkombëtar për të parandaluar destabilizimin.
“Ne duhet të jemi të përgatitur dhe të jemi vigjilentë, por mbi të gjitha duhet të mbështesim zgjidhjet diplomatike,” përfundoi kolonel Neziri, duke bërë thirrje për paqe dhe stabilitet rajonal./K.C/dritare.net
