Nga Messi te Ronaldo, 10 legjendat që mund t’i japin lamtumirën Kupës së Botës
Tuesday 30 June 2026, 21:09
Dritare.net
Me fazën me eliminim direkt që ka nisur, shumë prej yjeve më të mëdhenj të futbollit botëror mund të jenë duke luajtur ndeshjet e fundit në një Kupë Bote. BBC ka renditur 10 emrat më të spikatur, nga Lionel Messi dhe Cristiano Ronaldo te Luka Modriç, Neymar e Kevin De Bruyne, të cilët, për shkak të moshës, mund të mos jenë pjesë e Botërorit të vitit 2030.
Në krye të listës qëndron Lionel Messi. Në moshën 39-vjeçare, argjentinasi vazhdon të thyejë rekorde dhe po zhvillon Botërorin e tij të gjashtë, ndërsa triumfi i vitit 2022 mbetet kulmi i karrierës së tij me kombëtaren.
Pas tij renditet Luka Modriç, i cili në moshën 40-vjeçare vazhdon të jetë lideri i Kroacisë. Mesfushori veteran ka qenë protagonist në sukseset historike të vendit të tij, me finalen e vitit 2018 dhe vendin e tretë në vitin 2022.
Cristiano Ronaldo mban vendin e tretë. Portugezi 41-vjeçar është rekordmen për numrin e ndeshjeve dhe golave me kombëtaren, por Kupa e Botës mbetet trofeu i vetëm madhor që ende nuk e ka fituar.
Në listë bën pjesë edhe portieri Manuel Neuer, kampion bote me Gjermaninë në vitin 2014, ndërsa Neymar vazhdon të ëndërrojë triumfin me Brazilin, pavarësisht problemeve të shumta me dëmtimet në vitet e fundit.
Mes emrave të tjerë janë Kevin De Bruyne, Virgil van Dijk, Mohamed Salah, Son Heung-min dhe Sadio Mane, futbollistë që kanë lënë gjurmë në arenën ndërkombëtare dhe që mund të jenë duke mbyllur ciklin e tyre në kompeticionin më të rëndësishëm të futbollit botëror.
Sipas BBC, ky Botëror mund të shënojë fundin e një epoke për disa prej legjendave më të mëdha të lojës, të cilat kanë dominuar futbollin ndërkombëtar për më shumë se dy dekada./K.C/dritare.net
