Çfarë po ndodh në Venezuelë? Raportohet për sulme amerikane
E Shtunë 3 Janar 2026, 09:09
Dritare.net
Shpërthime janë dëgjuar në kryeqytetin e Venezuelës, Karakas, ndërsa shtëllunga të mëdha tymi janë parë të ngrihen mbi disa zona të qytetit, sipas raportimeve nga banorë dhe media lokale. Ngjarja ka shkaktuar panik mes qytetarëve, ndërkohë që autoritetet kanë mbyllur disa rrugë kryesore.
Sipas burimeve zyrtare amerikane, Presidenti i SHBA-së, Donald Trump, ka urdhëruar sulme ajrore ndaj objektivave brenda territorit të Venezuelës, përfshirë instalacione ushtarake. Lajmi është konfirmuar për CBS News, partneri amerikan i BBC-së, nga zyrtarë të administratës amerikane.
Qeveria e Venezuelës ka reaguar ashpër, duke i cilësuar veprimet si “agresion ushtarak të papranueshëm” dhe shkelje të sovranitetit të vendit. Në një deklaratë zyrtare, autoritetet në Karakas thanë se do të marrin “të gjitha masat e nevojshme” për të mbrojtur territorin dhe popullin venezuelian.
Ndërkohë, disa komunitete përreth kryeqytetit kanë mbetur pa energji elektrike, pas raportimeve për shpërthime të shumta në disa pika të ndryshme, përfshirë baza dhe objekte ushtarake. Ende nuk ka informacion zyrtar për viktima apo dëme të plota materiale.
Ky përshkallëzim vjen në një moment tensionesh të shtuara mes Shteteve të Bashkuara dhe Venezuelës, marrëdhënie që prej vitesh janë karakterizuar nga sanksione, përplasje diplomatike dhe akuza të ndërsjella. Korrespondenti ynë raporton se situata mbetet e paqëndrueshme, ndërsa komuniteti ndërkombëtar po ndjek nga afër zhvillimet dhe u bën thirrje palëve për përmbajtje./K.C/dritare.net
