Meloni pranon humbjen e referendumit. Çfarë do ndodhë tani!
E Hënë 23 Mars 2026, 17:05
Dritare.net
Kryeministrja e Italisë, Giorgia Meloni, ka pranuar humbjen në referendumin për reformën në drejtësi, duke theksuar se do të respektojë vendimin e qytetarëve italianë.
“Italianët kanë vendosur dhe ne e respektojmë këtë vendim. Do të vazhdojmë përpara me përgjegjësi dhe vendosmëri,” deklaroi Meloni pas publikimit të rezultateve.
Sipas mediave italiane, rreth 54% e votuesve votuan kundër reformës, ndërsa rreth 46% e mbështetën atë, duke i dhënë një goditje politike qeverisë së saj. Referendumi kishte një pjesëmarrje të lartë, afro 58–60%, çka tregon rëndësinë e madhe të votimit.
Reforma e propozuar synonte ndryshime të thella në sistemin gjyqësor, përfshirë ndarjen e karrierave të gjyqtarëve dhe prokurorëve, por u kritikua nga opozita si një rrezik për pavarësinë e drejtësisë.
Megjithë humbjen, Meloni përjashtoi dorëheqjen dhe theksoi se qeveria do të vazhdojë mandatin e saj normalisht, duke e cilësuar rezultatin si një “mundësi të humbur” për modernizimin e vendit.
Kjo është një nga goditjet e para politike për Melonin që prej ardhjes në pushtet dhe mund të ndikojë në skenën politike italiane përpara zgjedhjeve të ardhshme./K.C/dritare.net
