Eksperti austriak: Shqipëria ka potencial të jashtëzakonshëm në blegtori
Sunday 19 July 2026, 09:09
Dritare.net
Ndërkombëtarizimi i praktikave të biznesit në Shqipëri shpesh diskutohet në termat e turizmit apo industrisë fason, por bujqësia po tregon se është një terren po aq i favorshëm për marrëdhënie bilaterale afatgjata.
Ardhja dhe përfshirja e ekspertëve austriakë dhe kompanive ekskluzive si Austria Premix, tregon një ndryshim të rëndësishëm në mënyrën se si aktorët evropianë e shohin potencialin ekonomik të Shqipërisë. Vizitat e rregullta, një herë në dy muaj, të përfaqësuesve të huaj si Thomas Riegler evidentojnë rëndësinë e një pranie në terren për të ndërtuar besim dhe për të monitoruar zbatimin e teknologjisë ndërkombëtare te fermat vendase. Në intervistë për gazetaren Rudina Xhunga në DritareTV, Thomas Riegler nuk e fsheh admirimin për peizazhin, potencialin natyror dhe, më e rëndësishmja, vizionin e sipërmarrësve shqiptarë. Për një ekspert që ndjek zhvillimet bujqësore në të gjithë Evropën, ajo që po ndodh në ferma si ajo e vëllezërve Shelqetja në Shkodër përbën një rast studimi të jashtëzakonshëm të 'invetimit dhe guximit'.
Këta fermerë po përqafojnë thelbin e kapitalizmit modern: dhënien e një shansi ideve progresive. Ai shprehet se rritja e shpejtë dhe kapaciteti absorbues i këtyre bizneseve brenda vetëm pak viteve tregojnë një vitalitet të pazakontë në një sektor që në vende të tjera evropiane është shpesh në stanjacion. Qasja e partnerëve ndërkombëtarë nuk është vetëm furnizimi me lëndë ushqimore premium për kafshët, por përcjellja e një filozofie të re se si trajtohen gjallesat. Riegler flet me një pasion të veçantë për marrëdhënien midis njeriut dhe kafshës, duke theksuar se çdo lopë ka karakterin dhe zakonet e saj, gjë që e bën menaxhimin një proces delikat dhe kërkues. Kjo ndjeshmëri evropiane ndaj mirëqenies së kafshëve, kur aplikohet në Shqipëri, rrit automatikisht standardet e prodhimit në nivele të paimagjinueshme më parë. Fakte si vendimi i kompanive austriake për të zgjeruar operacionet e tyre nga Austria drejt Shqipërisë, me bindjen se këtu ka ende 'shumë punë për të bërë' dhe 'hapësirë masive për rritje', duhet të shërbejnë si një tregues i qartë për politikëbërësit vendas. Kjo prani e përsëritur thekson se bujqësia në veri të Shqipërisë nuk është thjesht një sektor mbijetese, por një industri me mundësi reale për t'u bërë konkurruese në tregun ballkanik, gjithmonë me parakushtin që mbështetja me know-how ndërkombëtar të vazhdojë pa u ndërprerë./dritare.net
