20 mijë euro për një favor/ Arrestohet me urdhër të SPAK, ish-punonjësi i Gardës së Republikës!
E Hënë 3 Nëntor 2025, 17:05
Dritare.net
Agjencia e Mbikëqyrjes Policore, në bashkëpunim me SPAK, ka ekzekutuar sot masa sigurie ndaj një ish-oficeri të Gardës së Republikës dhe një shtetasi tjetër, të dyshuar për ushtrim të ndikimit të paligjshëm. Ish-oficeri Z. M. është arrestuar dhe ndodhet në burg, ndërsa K. D. është vënë nën masën “detyrim për t’u paraqitur”.
Hetimet zbuluan se ata, kundrejt shumës prej 20 mijë eurosh, kishin premtuar përshpejtimin e procedurave ligjore për një shtetase. Vijojnë hetimet për identifikimin e personave të tjerë të përfshirë në këtë rast korrupsioni.
“Agjencia e Mbikëqyrjes Policore (Rajoni Tiranë) në bashkëpunim me Prokurorinë e Posaçme Kundër Korrupsionit dhe Krimit të Organizuar, pas një hetimi të plotë me metoda speciale, sot në datë 03.11.2025 ka ekzekutuar masat e sigurisë me karakter shtrëngues ndaj një ish punonjësi të Gardës së Republikës dhe një shtetasi, të dyshuar për kryerjen e veprës penale “Ushtrim i ndikimit të paligjshëm ndaj personave që ushtrojnë funksione pubike” në bashkëpunim, parashikuar në nenet 245/1 paragrafi 4 dhe neni 25 të Kodit Penal dhe konkretisht;
Masa e sigurisë “Arrest në burg” parashikuar në nenin 238 të Kodit të Pr. Penale ndaj Z. M., me detyrë në kohën e kryerjes së veprës penale, Oficer pranë Gardës së Republikës me gradën Komisar.
Masa e sigurisë “Detyrim për tu paraqitur në policinë gjyqësore” parashikuar në nenin 234 të Kodit të Pr. Penale ndaj shtetasit K. D., banues në Tiranë, i shpallur në kërkim.
Gjatë veprimeve hetimore, proceduriale shteruese në drejtimin e SPAK u arrit të provohej se këta dy shtetas në role të ndryshme gjatë kryerjes së veprës penale, në këmbim të shumës prej 20 mijë Euro, i kanë premtuar një shtetaseje (kallëzueses) se do ta ndihmonin në përshpejtimin e procedurave dhe veprimeve juridike në një institucion shtetëror.
Vijojnë veprimet hetimore për përfshirjen e mundshme të personave të tjerë në këtë veprimtari kriminale.
AMP mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast të abuzimit apo shkeljes së ligjit nga ana e punonjësve të strukturave, duke telefonuar në numrin e gjelbër 0800 9090, ose duke dërguar Email në adresën [email protected]”, njofton AMP./dritare.net
