Bleona Qereti e paditi dhe kërkon 2 mln $, reagon Kokalari: Do përgjigjem ligjërisht
E Shtunë 30 Gusht 2025, 20:08
Dritare.net
Artistja, Bleona Qereti, ka njoftuar ngritjen e një padie në Gjykatën e Lartë të New York-ut ndaj aktivistes dhe politikanes shqiptaro-amerikane, Evi Kokalari. Nëpërmjet një deklarate për media, këngëtarja bën të ditur se e ka ndërmarrë këtë hap ligjor pas akuzave që Kokalari ka bërë në adresë të saj.
Në padinë e depozituar më 15 gusht 2025 përmes studios ligjore Waymaker LLC, Qereti kërkon 2 milionë dollarë dëmshpërblim, me argumentin se deklaratat e Kokalarit kanë cenuar rëndë reputacionin dhe karrierën e saj ndërkombëtare.
“Pasi u ndje e kërcënuar nga prania dhe fama e Bleonës në rrethet e ndryshme mediatike dhe politike, për të avancuar agjendën e saj, Evi Kokalari në vitin 2022 ndërpret çdo marrëdhënie me Bleonën, dhe nis një fushatë hakmarrëse ndaj saj, duke fabrikuar e publikuar narrativa të rreme dhe duke bërë interpretim dashakeq të materialeve artistike dhe fotografive të Bleonës në rrjete sociale dhe media, me qëllim të shkaktonte polemika dhe të dëmtonte në mënyrë të parikuperueshme reputacionin e saj”-thuhet në deklaratën e këngëtares.
Qereti pretendon se kjo fushatë ka qenë thellësisht dëmtuese, duke ndikuar si në aspektin profesional, ashtu edhe në atë personal.
Sakaq, Evi Kokalari ka reaguar për Euronews Albania në lidhje me padinë e bërë në adresë të saj. Kokalari e konsideron deklaratën e bërë nga Qereti si absurde dhe të nxjerrë jashtë kontekstit, madje shton se përmendja e bashkëpunëtorëve të administratës së President Trump në padi do t’i kthehet në “boomerang” këngëtares.
Ajo njofton gjithashtu se do të përgjigjet ligjërisht ndaj padisë së Qeretit së bashku me ata që janë përmendur në mënyrë të paautorizuar, duke argumentuar se padia përmban të pavërteta që mund të provohen nga dëshmitarë të njohur në Shqipëri.
Reagimi i plotë i Evi Kokalarit:
“Deklarata për shtyp që paditësja i ka nisur medias Shqiptare sot, është absurditet sidomos kur zgjedhë copëzat të saj thjeshtë për të dëmtuar figurën time, ndërkohë që për dëmtim figure më akuzon në këtë padi.
Nuk di nëse duhet ta quaj tragjedi sociale këtë fenomen, ku individë të fushës së artit aludojnë se jemi ne të politikës që po ju dëmtojnë reputacionin, apo janë ata që fusin hundët në çështjet dhe marrëdhëniet tona, duke sjellur dëme në relacione politike që janë ndërtuar për të ndihmuar në çështjet e Shqipërisë dhe Kosovës. Të përmëndësh emra që janë pjesë e administratës së President Trump, në një padi kaq ordinere, dhe pastaj ta çosh për publikimin në median Shqiptare, është diçka që do ti kthehet paditësit vet si boomerang.
Përtej kësaj, padia ka absurditete dhe gënjeshtra, për të cilën janë gati të dalin dëshmitar që janë boll të njohur në Shqipëri. Thjeshtë se ti pretendon diçka në një dokument gjyqi, nuk do të thotë që është e vërtet.
Padinë e kam lexuar në detaje dhe unë dhe ata që kjo ka implikuar në të dhe do ti përgjigjemi së bashku në një zë.
Kjo padi mund të botohej shumë mirë kur të dilte vendimi i gjykatës, dhe ju garantoj që do përfundoj ajo vetë duke më paguar mua personalisht por dhe ata që ka përmëndur (pa asnjë autorizim) në atë padi dhe që sot janë pjesë e administratës Trump. E vetmja keqardhje që kam është që individët e administratës që ka implikuar janë individë që i ka njohur nga unë, dhe këtë s’ja fal vetes, sepse e di që ju ka krijuar stres komplet të panevojshëm duke ngritur pikëpyetje për kredibilitetin tim. Këta individë nuk duan emrat e tyre në asnjë padi, jo më në një padi të një personazhi si Bleona Qerreti”./euronews
