Clinton, defibrilatori dhe humbjet e njerëzve tanë!
E Diel 31 Gusht 2025, 14:02
Dritare.net
Në foton e fundit që qarkulloi nga SHBA, Bill Clinton shfaqej pranë një defibrilatori. Një aparat i vogël, por që shpëton jetë. Në Perëndim, defibrilatorët janë kudo: në aeroporte, shkolla, palestra, rrugë. Janë bërë pjesë e përditshmërisë, si telefoni apo karta e identitetit.
Këtë e konfirmon edhe Alban Beltoja, anestezist në Milano, i cili thotë per Dritare Tv
“Në Itali, jo vetëm mjekët, por edhe mësuesit, sportistët, gazetarët, çdo qytetar i thjeshtë, bëjnë kurse BLS për të mësuar si t’i japin ndihmën e parë dikujt që bie në tokë pa ndjenja. Defibrilatori është një kuti që të udhëzon vetë, hap pas hapi. Është e vetmja ndërhyrje vendimtare që kthen ritmin e zemrës nga kaosi në normalitet. Por duhet të ndodhë brenda minutave të para, përndryshe është shumë vonë”.
Dy raste që na e kujtojnë dhimbshëm
Në Tiranë, te Hotel Rogner, ish-kryetari i Forumit Rinor të PD-së, Gerti Bogdani, humbi jetën pas një arresti kardiak. Ende nuk dihet nëse kishte një defibrilator në hotel, ose nëse dikush dinte ta përdorte.
Në Sarandë, sipas nje shkrimi që po qarkullon në media, Artur Zheji ndërroi jetë pasi ambulanca që mbërriti aty rezultoi e papajisur me defibrilator dhe pajisje bazike të reanimacionit. Megjithatë, këtë mund ta konfirmojë vetëm Ministria e Shëndetësisë, ndaj mbetet për t’u pritur deklarata zyrtare. Po presim ta beje!
Çfarë na mungon?
Shembulli i Italisë dhe i shumë vendeve të tjera europiane tregon se defibrilatorët publikë dhe trajnimi i qytetarëve janë shpëtimtarë. Nëse në vendngjarje ka një pajisje të tillë dhe dikush që di të fillojë masazhin kardiak, jeta ka më shumë shanse të vazhdojë. Arresti kardiak, jeta dhe vdekja nuk janë vetëm çështje fati, por përgjegjësie. /dritare.tv
