Flutura Açka: Deputeti i PD-së që shkarkoi numëruesin sepse nuk po vidhte vota!
E Mërkurë 3 Shtator 2025, 19:07
Dritare.net
Gjatë intervistës së saj për programin “Dekalog” të Roland Qafokut në DritareTV, Flutura Açka rrëfeu për përvojat e saj gjatë fushatës së 2021-shit dhe praktikat brenda partive politike. Ajo tregoi se një deputet i PD-së në Elbasan shkarkoi vetë numëruesin e tij sepse nuk po “vidhte vota”:
“Ishte një deputet i PD-së që hoqi numëruesin e vet sepse nuk po i vidhte vota. Është një kolegu im në Elbasan, emrin nuk po e them,” tha Açka.
Ajo shtoi se gjatë atij procesi nuk kishte njohuri për mënyrën se si funksiononte një fushatë elektorale:
“Në 2021-shin unë nuk njihja fare parti, nuk e dija si funksiononte. Çdo gjë kishte mbaruar, unë nuk dija asgjë, as shtab, asgjë.”
Açka tregoi gjithashtu se kishte sugjeruar krijimin e një manuali për fushatat:
“U kam thënë deputetëve të PD-së që duhet bërë një manual se si funksionon në fushatë një kandidat për deputet. Kur u thashë, ata hapën sytë: ‘Ç’është ky manual, bëj shtab,’ thanë. Po çfarë është ky shtab, unë kam ardhur te partia. Partia e di.”
Açka përfundoi duke vënë në dukje se PD-ja në këto katër vjet duket se funksionon më shumë si një “parti fushate”, e organizuar sipas nevojave të momentit dhe jo sipas strukturave të konsoliduara.
"Ajo që zbulova është që PD-ja në këto katër vjet është parti fushate, është parti që mblidhet më fishkëllima, jo me struktura.", përfundoi Açka./K.C/dritare.net
