Integrimi në BE dhe Korridori 8/ Rama flet për RAI-n: Italia, mbështetësja kryesore
E Hënë 30 Mars 2026, 16:04
Dritare.net
Kryeministri Edi Rama ka deklaruar se procesi i integrimit evropian të Shqipërisë ka marrë një shtysë të fortë në periudhën e fundit, si rezultat i përmbushjes së detyrimeve ndaj Bashkimit Evropian, por edhe për shkak të vullnetit të vetë BE-së për të avancuar me politikën e zgjerimit.
Në një intervistë për RAI, Rama theksoi rolin e rëndësishëm të Italia si partnere strategjike të Shqipërisë, duke e cilësuar atë si mbështetësen kryesore të vendit në rrugën drejt integrimit. Ai u ndal gjithashtu te rëndësia e Korridori 8, duke nënvizuar se projekti ka hyrë në një fazë të re zhvillimi falë angazhimit të qeverisë italiane
“Italia nuk është një nga mbështetësit kryesorë, por Italia është mbështetësi kryesor i Shqipërisë. Korridori 8 është një projekt strategjik shumë i rëndësishëm që, në të vërtetë, falë kësaj qeverie që është në Itali, përfundimisht ka hyrë në një fazë të re”, u shpreh kryeministri.
Sipas Ramës, Korridori 8 përfaqëson një projekt strategjik me rëndësi të madhe për rajonin dhe për lidhjen infrastrukturore të Europës, duke forcuar bashkëpunimin mes dy vendeve.
“Po. Është një korridor paneuropian i ndërlidhjes, i linjave të transportit, hekurudhave, rrugëve tokësore, digjitalizimit, porteve, aeroporteve, etj. Do të lidhë dy dete, Detin Adriatik dhe Detin e Zi. Është një projekt lindje-perëndim. Ministri Tajani erdhi kohët e fundit në Shqipëri për eventin e Korridorit 8 për t’i mëshuar rëndësisë që ka kjo linjë e re si në terma strategjikë, të sigurisë, stabilitetit dhe lëvizshmërisë ushtarake, por edhe në anën e përfitimeve të ndërmarrjeve tona”, u shpreh ai.
Në intervistë, Rama u ndal edhe te projekti i linjës nënujore energjetike me vlerë 1 miliard euro, që do të lidhë Shqipërinë me Italinë. Ai bëri të ditur se për këtë projekt është firmosur një marrëveshje trilaterale mes Shqipërisë, Italisë dhe Emiratet e Bashkuara Arabe, duke e cilësuar atë si një projekt strategjik me rëndësi për gjithë Evropën.
“Është e vërtetë që kemi firmosur një marrëveshje trilaterale mes Shqipërisë, Italisë dhe Emirateve Arabe për këtë projekt, që është sërish një projekt strategjik i Evropës që nis nga Shqipëria dhe Italia”, tha Rama./K.C/dritare.net
