Karl Topia, nip i Mbretit të Francës! Historia që pak e dinë!
E Mërkurë 27 Maj 2026, 18:06
Dritare.net
Në emisionin “Dekalog” në DritareTV, me gazetarin Roland Qafoku, historiani Thomas Frashëri solli në vëmendje një prej tezave më intriguese mbi dinastinë e njohur shqiptare të Topiajve: pretendimin se Karl Topia ishte “nip dhe prej gjaku i Mbretit të Francës”.
Sipas Frashërit, kjo lidhje nuk është thjesht një legjendë mesjetare, por lidhet me strukturat familjare dhe martesore të kohës, ku Topiajt përfaqësonin një nga familjet më të rëndësishme të aristokracisë arbërore, me ndikim të fortë politik dhe kulturor në Shqipërinë e shekullit XV.
Martesa e detyruar nga Skënderbeu dhe lidhjet dinastike
Në bisedë u soll gjithashtu një tjetër episod historik: ndërhyrja e Skënderbeut, i cili sipas rrëfimeve, ka ndikuar në martesat brenda elitës shqiptare të kohës, përfshirë edhe lidhjet e Karl Topisë me Mamicën, si pjesë e strategjive politike të konsolidimit të aleancave arbërore.
Topiajt dhe “kodi heraldik” i Mesjetës
Frashëri theksoi se familja Topia mbart një simbolikë heraldike e pazakontë për botën arbërore, me elementë franko-anzhuin dhe bizantin, duke sugjeruar ndikime të thella europiane në identitetin e saj.
“Stema e Topiajve nuk është thjesht simbol, por një kod historik që duhet zbërthyer,” u shpreh ai, duke e krahasuar me një sistem vizual që tregon origjinën dhe lidhjet familjare në mungesë të dokumenteve të shkruara.
Gjenealogjia dhe lidhjet me Perandorinë Osmane
Në analizën e tij, Frashëri solli edhe një dimension tjetër të debatit historik: lidhjet e disa degëve të aristokracisë arbërore me strukturat osmane, ku disa pasardhës të Topiajve dhe familjeve të lidhura me ta shfaqen në defterët osmanë si pjesë e administratës dhe elitës ushtarake.
Sipas tij, këto lidhje tregojnë një realitet kompleks të shekullit XV, ku familjet shqiptare lëviznin midis krishterimit dhe islamit, duke ruajtur ndikimin e tyre politik në rajon.
Një debat që hap pyetje të reja historike
Teza e lidhjeve evropiane të Topiajve dhe interpretimet mbi gjenealogjinë e tyre mbeten ende objekt debati mes historianëve, duke përfshirë edhe kritika dhe referenca ndaj burimeve mesjetare si Gjon Muzaka dhe autorë të tjerë.
Megjithatë, ky diskutim hap një dritare të re mbi mënyrën se si historia e Arbërisë mesjetare lidhet me dinastitë europiane dhe strukturat politike të kohës./K.C/dritare.net
