Pamje të papara më parë. Astronautët e Artemis II shohin anën e fshehtë të Hënës
E Martë 7 Prill 2026, 08:08
Dritare.net
Astronautët e misionit Artemis II kanë arritur të shohin pamje që asnjë njeri nuk i ka parë më parë, ndërsa kaluan në anën e largët të Hënës gjatë udhëtimit të tyre historik.
Gazetarja e shkencës Esme Stallard raportoi se, pasi u rikthye komunikimi me ekuipazhin, interesi i shkencëtarëve dhe publikut është përqendruar tek fotografitë që astronautët kanë realizuar nga kjo zonë e panjohur.
Megjithëse satelitët dhe sondat hapësinore nga vende si Kina dhe India kanë dërguar më parë imazhe nga kjo pjesë e Hënës, kjo është hera e parë që ajo vëzhgohet drejtpërdrejt nga syri i njeriut.
Astronautët përdorën kamera digjitale për të kapur pamjet, por sipas ekspertëve, përvoja njerëzore mbetet e pazëvendësueshme. Chris Lintott, profesor i astrofizikës në Universitetin e Oksfordit dhe bashkëprezantues i emisionit The Sky at Night, theksoi se vlera kryesore e këtyre imazheve është më shumë artistike sesa shkencore.
Megjithatë, shumë studiues besojnë se vëzhgimi njerëzor ka një rëndësi të veçantë në shkencë. Abbie MacKinnon, kuratore në Muzeun e Shkencës, u shpreh se ndonëse ekzistojnë imazhe satelitore, “nuk është njësoj si të jenë njerëzit atje për të vendosur vetë se çfarë ia vlen të fotografohet”.
Misioni vazhdon të konsiderohet një hap i madh jo vetëm për eksplorimin hapësinor, por edhe për mënyrën se si njerëzit përjetojnë dhe interpretojnë universin përreth tyre.
Astronautët e misionit Artemis II janë nisur drejt Tokës pas një fluturimi historik rreth Hënës, gjatë të cilit përjetuan edhe një eklips të plotë diellor nga hapësira.
Komandanti Reid Wiseman deklaroi se ekuipazhi i anijes Orion spacecraft “pa pamje që asnjë njeri nuk i ka parë më parë”, ndërsa piloti Victor Glover shtoi se “nuk ka fjalë për të përshkruar atë që pamë”.
Gjatë fluturimit rreth Hënës, anija arriti distancën maksimale prej 252,756 miljesh (406,771 km) nga Toka, duke thyer rekordin e mëparshëm për udhëtimin më të largët të kryer ndonjëherë nga njerëzit në hapësirë.
Ekuipazhi humbi përkohësisht komunikimin me NASA për rreth 40 minuta ndërsa ndodheshin pas Hënës – një ndërprerje e parashikuar në mision. Pas rikthimit të sinjalit, specialistja e misionit Christina Koch u shpreh: “Është kaq mirë të dëgjojmë përsëri Tokën”.
Presidenti amerikan Donald Trump përgëzoi astronautët duke thënë se ata “kanë bërë histori dhe e kanë bërë Amerikën shumë krenare”, si dhe i ftoi në Shtëpinë e Bardhë.
Astronautët pritet të përfundojnë misionin me ulje në Oqeanin Paqësor, në brigjet perëndimore të SHBA-së, në orën 20:07 sipas kohës lindore amerikane./L.F-dritare.net
