Ushtria amerikane godet në Ngushticën e Hormuzit!
E Mërkurë 18 Mars 2026, 08:08
Dritare.net
Ushtria amerikane njofton se ka goditur disa pozicione raketore iraniane përgjatë Ngushticës së Hormuzit, duke përdorur municione të fuqishme të afta për të depërtuar në bunkerë të fortifikuar.
Në një reagim në platformën X, Komanda Qendrore e SHBA-së (CENTCOM) bëri të ditur se forcat amerikane kanë përdorur me sukses bomba depërtuese prej rreth 5,000 paundësh ndaj objektivave të përforcuara përgjatë vijës bregdetare iraniane.
Sipas ushtrisë amerikane, këto baza raketore përbënin një kërcënim serioz për anijet dhe transportin ndërkombëtar detar në Ngushticën e Hormuzit – një nga rrugët më të rëndësishme energjetike në botë.
Më herët, tensionet në zonë kanë çuar në ndërprerje të trafikut detar, ndërsa rreth 20% e furnizimit global me naftë kalon përmes kësaj ngushtice, duke ndikuar drejtpërdrejt në rritjen e çmimeve në tregjet ndërkombëtare.
Bombat e përdorura janë të ngjashme me të ashtuquajturat “shkatërruese bunkerësh”, të cilat SHBA i ka përdorur edhe më parë kundër objekteve bërthamore nëntokësore në Iran.
Këto lloj bombash janë të projektuara të depërtojnë thellë në tokë ose në struktura të fortifikuara përpara se të shpërthejnë, duke i bërë ato veçanërisht efektive kundër objektivave të mbrojtura nëntokësore./BBC
