Veliaj: Fatos Nano me vizionin e tij evropian i dha vendit një politikë moderne!
E Premte 31 Tetor 2025, 19:07
Dritare.net
Ish-kryebashkiaku Erion Veliaj ka reaguar në lidhje me ndarjen nga jeta të Fatos Nano. Lideri historik i PS mbylli sytë përgjithmonë, sot në moshën 73-vjeçare.
Veliaj shprehet se Nano me aktet e tij solli një politikë moderne në Shqipëri, dhe se socialistët do t’i jenë mirënjohës gjithmonë.
Reagimi i plotë:
Me trishtim mora lajmin e ndarjes nga jetatë Fatos Nanos, kryetari që formësoi Partinë Socialiste dhe politikën moderne shqiptare. Me vizionin e tij qytetar dhe thellësisht europian, ai besoi se e majta duhet të ishte hapje, debat dhe progres, jo thjesht dogmë.
Sot kujtojmë me respekt një udhëheqës tolerant e liberal, i cili diti t’i tregojë këto cilësi edhe me mua, vite më parë, në ditët e rebelimit aktivist.
Demokracia nuk matet me sa shumë flasim, por si debatojmë me qytetari dhe sa shumë dimë të dëgjojmë njëri-tjetrin. Sepse liria nuk është vetëm e drejta për të folur, por edhe përgjegjësia për të kuptuar.
Kjo ishte fryma që Fatos Nano i dha të majtës shqiptare dhe për çka duhet t’i jemi mirënjohës.
U prehtë në paqe./dritare.net
