Një studim i ri i publikuar në revistën shkencore European Heart Journal ka ngritur shqetësime mbi ndikimin e konservuesve të përdorur gjerësisht në ushqimet e përpunuara dhe të paketuara. Sipas hulumtimit, disa prej këtyre aditivëve mund të lidhen me një rritje të rrezikut për tension të lartë të gjakut, sulme në zemër dhe goditje në tru.
Studimi u realizua nga studiues francezë duke përdorur të dhënat e projektit NutriNet-Santé, një program i madh kërkimor që prej vitit 2009 monitoron zakonet ushqimore dhe shëndetin e pjesëmarrësve në Francë. Në analizë u përfshinë më shumë se 112 mijë persona mbi moshën 15-vjeçare.
Pjesëmarrësit regjistronin me detaje ushqimet dhe pijet që konsumonin, duke përfshirë markat dhe përbërësit. Studiuesit krahasuan nivelet e konsumit të konservuesve me të dhënat shëndetësore të mbledhura ndër vite.
Rezultatet treguan se personat me konsum më të lartë të disa konservuesve kishin:
29% rritje të rrezikut për hipertension (tension të lartë të gjakut);
16% rritje të rrezikut për sëmundje kardiovaskulare, përfshirë sulmet në zemër dhe goditjet në tru.
Nga 58 konservues të analizuar, studiuesit identifikuan disa që kishin lidhje më të forta me rrezikun kardiovaskular. Mes tyre ishin:
Nitriti i natriumit, i përdorur shpesh në mishrat e përpunuar si proshuta, sallamet dhe produktet e konservuara;
Sorbati i kaliumit, që përdoret në produkte furre, djathëra dhe salca;
Metabisulfiti i kaliumit, i pranishëm në verë, lëngje dhe pije të fermentuara.
Po ashtu, studiuesit gjetën lidhje edhe me disa konservues antioksidantë që shpesh konsiderohen “natyralë”, si:
Acidi askorbik (vitamina C e shtuar);
Acidi citrik;
Ekstraktet e rozmarinës.
Autorët theksuan se rezultatet nuk lidhen me vitaminën C ose acidin citrik që gjenden natyrshëm në fruta dhe perime. Sipas tyre, forma e shtuar industriale mund të ketë efekte të ndryshme nga përbërësit që merren natyrshëm nga ushqimi.
Ekspertë të pavarur thanë se studimi është ndër të parët që shqyrton ndikimin e konservuesve individualë dhe jo vetëm kategorinë e përgjithshme të ushqimeve ultra të përpunuara. Megjithatë, ata nënvizuan se studimi është vëzhgues, që do të thotë se nuk provon drejtpërdrejt shkak dhe pasojë.
Studiuesit rekomandojnë që konsumatorët të favorizojnë ushqime të freskëta ose minimalisht të përpunuara, si dhe të zgjedhin alternativa me më pak aditivë kur është e mundur. Ata theksojnë se konservuesit janë tashmë të pranishëm në shumë produkte të përditshme, prandaj fokusi duhet të jetë në një model ushqyerjeje më të balancuar dhe më pak të varur nga ushqimet e përpunuara./L.F-dritare.net
