Si e mposhti Shqipëria, imazhin e gangsterëve në mediat e huaja!
E Premte 20 Mars 2026, 10:10
Dritare.net
Pas dekadash izolimi të ashpër dhe një tranzicioni të ngarkuar me imazhe të errëta në lajmet botërore, Shqipëria po kalon një epokë të artë në turizëm. Kalimi nga një vend i mbuluar nga frika te një hotspot mediatik evropian ishte fokusi i një analize të hollësishme të ekspertit Elton Çaushi në emisionin Shqip me gazetaren Rudina Xhunga në DritareTV. Pika e kthesës nuk ndodhi brenda një sezoni, por është produkt i një rritjeje të vazhdueshme që filloi të ndihej thellësisht rreth vitit 2015, thotë Çaushi, për të shpërthyer pastaj në mënyrë dramatike pas pandemisë Covid-19.
Historikisht, mediat e huaja i kishin ndërtuar Shqipërisë një profil të rëndë: atdheu i gangsterëve, një tokë me gjakmarrje dhe rreziqe, një hapësirë ku kriminaliteti mbizotëronte mbi institucionet. Megjithatë, dekada e fundit solli një ndryshim monumental. 'Uria' e vizitorit perëndimor, të ngopur me destinacionet e mbipopulluara tradicionale si Italia apo Greqia, shtyu kërkimin për terrene të reja, origjinale dhe gjeografikisht të afërta. Shqipëria, me një vijë bregdetare fantastike, male alpine dhe një kulturë thellësisht të fokusuar te mikpritja, u shndërrua papritur në 'zbulimin' e madh të medias perëndimore.
Ndërkohë që kritikët shpesh spekulojnë se prania masive e mediave ndërkombëtare të nivelit të lartë u sponsorizua nga buxhetet e shtetit shqiptar, profesionistët e fushës theksojnë se interesimi ka qenë tërësisht organik. Gazetarët e huaj, veçanërisht ata nga Parisi, Londra apo Berlini, kishin dëshpërimisht nevojë për histori të reja të suksesshme afër shtëpisë. Shqipëria u ofroi atyre arkeologji të pasur, një gastronomi të mrekullueshme, natyrë të paprekur dhe histori njerëzore frymëzuese. Bumi ndërkombëtar u stimulua gjithashtu edhe nga reagimi i diasporës shqiptare. Ndërsa shumë emigrantë refuzonin t'i kthenin sytë pas për vite me radhë, vlerësimi pozitiv ndërkombëtar u zgjoi atyre krenarinë e humbur, duke i shtyrë të vizitojnë dhe shpesh të riinvestojnë në vendlindje.
Rajone të caktuara të vendit kanë marrë një profil të lartë falë kësaj rritjeje. Qytetet me rëndësi të jashtëzakonshme historike të mbrojtura nga UNESCO, si Berati dhe Gjirokastra, kanë parë modele të mikpritjes që kapërcejnë pritshmëritë. Akomodimet nuk po synojnë më një luks të ngurtë e masiv, por një koncept që thekson autenticitetin, rehatinë intime (cozy) dhe histori personale. Hotele si 'Mangalemi' në Berat, i cili nuk e ka humbur fokusin e tij origjinal te komuniteti dhe tradita, si dhe hotelet historike në Gjirokastër, të cilat ruajnë gurët qindravjeçarë duke ofruar komoditet bashkëkohor, tregojnë qartë modelin e suksesshëm drejt të cilit po shkon hoteleria e kultivuar shqiptare.
Për më tepër, veriu i vendit ka krijuar histori suksesi të veta, me fenomene ndërkombëtare agroturistike që shkojnë përtej një vakti ushqimor, duke u shndërruar në lëvizje energjike që edukojnë dhe frymëzojnë një komunitet të tërë të rinjsh t'i kthehen punës së tokës pa pasur asnjë kompleks për prejardhjen rurale. Mposhtja e 'kompleksit të fshatit' te të rinjtë që tashmë i shërbejnë turistëve të huaj me dinjitet maksimal është ndoshta një nga arritjet më të mëdha sociale të këtij zhvillimi. Ky bum nuk është vetëm rritje numrash në bilancet e shtetit; është procesi i një shërimi kombëtar dhe rizbulimi të identitetit europian të Shqipërisë, që asnjë krizë tjetër nuk mund ta kthejë dot pas./K.C/dritare.net
