Donald Trump: Jam i zhgënjyer nga Putin, por nuk kam mbaruar punë me të!
E Martë 15 Korrik 2025, 19:07
Dritare.net
Ish-presidenti i Shteteve të Bashkuara, Donald Trump, ka deklaruar se është i zhgënjyer nga presidenti rus Vladimir Putin, por ende nuk e ka përfunduar marrëdhënien me të. Këto komente i bëri në një bisedë telefonike ekskluzive për BBC-në.
I pyetur nëse i beson Putinit, Trump u përgjigj: “Unë nuk i besoj pothuajse askujt.”
Deklaratat vijnë vetëm disa orë pasi Trump shpalli planet për të dërguar armë në Ukrainë dhe paralajmëroi vendosjen e tarifave të ashpra ndaj Rusisë nëse nuk arrihet një marrëveshje për armëpushim brenda 50 ditëve.
Në një intervistë nga Zyra Ovale, ai gjithashtu shprehu mbështetjen për NATO-n, duke u tërhequr nga deklaratat e mëhershme ku e kishte quajtur aleancën “të vjetruar”. Ai ritheksoi përkushtimin e tij ndaj parimit të mbrojtjes së përbashkët të NATO-s.
Telefonata, që zgjati 20 minuta, u bë në kuadër të diskutimeve për një intervistë përvjetore, një vit pas atentatit ndaj tij gjatë një tubimi elektoral në Butler, Pensilvani.
I pyetur nëse ngjarja e kishte ndryshuar, Trump tha se përpiqet të mos e mendojë. “Nuk më pëlqen të mendoj nëse më ka ndryshuar. Nëse ndalem shumë te kjo, mund të jetë diçka që më ndryshon jetën.”
Pas një takimi me sekretarin e përgjithshëm të NATO-s, Mark Rutte, Trump foli gjerësisht për zhgënjimin e tij nga presidenti rus.
Ai tregoi se kishte menduar se një marrëveshje për t’i dhënë fund luftës në Ukrainë ishte afër në katër raste të ndryshme, por gjithmonë ishte prishur nga veprimet e papritura të Rusisë.
I pyetur nga BBC nëse e kishte mbyllur kapitullin me Putinin, ai u përgjigj: “Jam i zhgënjyer prej tij, por nuk kam mbaruar punë me të. Por po, jam i zhgënjyer.”
Kur u pyet se si do ta bindte Putinin të ndalte gjakderdhjen, Trump tha: “Po punojmë për këtë, Gary. Do të kemi një bisedë të mirë. Do të them: ‘Shumë mirë, mendoj se jemi afër,’ dhe pastaj ai rrëzon një ndërtesë në Kiev.”
Në javët e fundit, Rusia ka intensifikuar sulmet me dronë dhe raketa në qytetet ukrainase, duke shkaktuar viktima rekord në mesin e civilëve. Lufta nisi me pushtimin e plotë të Ukrainës nga Rusia në vitin 2022.
Putin ka pohuar se dëshiron paqe, por këmbëngul se “shkaqet rrënjësore” të luftës duhet të zgjidhen më parë. Ai pretendon se konflikti është pasojë e kërcënimeve të jashtme ndaj sigurisë së Rusisë nga Kievi, NATO-ja dhe “Perëndimi kolektiv”./K.C/dritare.net
