Çdo qytetar me vendbanim në Shqipëri, i detyruar të deklarojë adresën në e-Albania
E Martë 15 Korrik 2025, 21:09
Dritare.net
Të gjithë qytetarët që jetojnë në territorin e Republikës së Shqipërisë do të kenë detyrimin ligjor për të kryer vetëdeklarimin e adresës së tyre përmes portalit qeveritar e-Albania. Ky detyrim vjen pas hyrjes në fuqi të një vendimi të publikuar në Fletoren Zyrtare.
Sipas vendimit, çdo qytetar duhet të ngarkojë në llogarinë e tij personale në e-Albania një nga dokumentet që vërtetojnë adresën e deklaruar, si:
-dokumentin e pronësisë së banesës,
-kontratën e qirasë,
-marrëveshjen e huadhënies apo të përdorimit,
ose çdo dokument tjetër të ligjshëm që provon vendbanimin ose vendqëndrimin.
E njëjta procedurë do të aplikohet edhe për rastet e ndryshimit të adresës së vendbanimit, ku qytetarët do të duhet të ngarkojnë dokumentacionin përkatës që vërteton ndryshimin.
Një tjetër rregull i përcaktuar në vendim është që të gjithë anëtarët e një familjeje duhet të kenë të deklaruar të njëjtën adresë, me të gjithë elementët përbërës të saj.
Përjashtime të veçanta janë parashikuar për shtetasit që ndodhen:
në institucionet e ekzekutimit të vendimeve penale,
në paraburgim për më shumë se tre muaj,
apo në institucione shëndetësore për kurim mjekësor mbi tre muaj.
Për këto raste, sipas vendimit:
“Institucioni përgjegjës duhet të paraqesë, brenda 48 orëve pranë zyrës së gjendjes civile, listën emërore të tyre.”/K.C/dritare.net
