Pas armëpushimit, Irani kërcënon: Anijet që kalojnë në Ngushticën e Hormuzit do të shkatërrohen
E Mërkurë 8 Prill 2026, 18:06
Dritare.net
Tensionet në Lindjen e Mesme vijojnë të mbeten të larta, pasi Irani ka paralajmëruar se çdo anije që kalon në Ngushticën e Hormuzit pa leje do të “shënjestrohet dhe shkatërrohet”, duke rritur ndjeshëm pasigurinë në një nga korridoret më të rëndësishme të transportit të naftës në botë.
Ky paralajmërim vjen vetëm pak orë pas një marrëveshjeje të përkohshme armëpushimi mes SHBA-së dhe Iranit, e cila parashikon lejimin e kufizuar të kalimit të anijeve për një periudhë dyjavore. Megjithatë, interpretimi i kësaj marrëveshjeje ka krijuar konfuzion: ndërsa pala amerikane e sheh si një hap drejt hapjes së rrugës detare, Teherani këmbëngul se çdo anije duhet të pajiset me leje paraprake nga autoritetet e tij.
Sekretari amerikan i Mbrojtjes, Pit Hegseth, deklaroi se ekziston “një mundësi reale për paqe”, ndërsa presidenti Donald Tramp u shpreh se SHBA-ja do të bashkëpunojë ngushtë me Iranin për të shmangur përshkallëzimin e mëtejshëm. Megjithatë, deklaratat nga pala amerikane janë shoqëruar me paqartësi dhe mesazhe të përziera.
Ndërkohë, situata në terren mbetet e tensionuar. Qindra, madje mijëra anije raportohen të bllokuara në Gjirin Persik, ndërsa vetëm një numër i kufizuar ka arritur të kalojë përmes ngushticës me leje të posaçme. Kompanitë ndërkombëtare të transportit detar po tregohen të kujdesshme dhe po shmangin kalimet, për shkak të rrezikut të lartë të përshkallëzimit ushtarak.
Ngushtica e Hormuzit mbetet një arterie jetike për ekonominë botërore, pasi rreth 20% e furnizimit global me naftë kalon përmes saj. Çdo ndërprerje e trafikut në këtë zonë ndikon drejtpërdrejt në çmimet e energjisë dhe stabilitetin ekonomik global.
Pavarësisht shpalljes së armëpushimit, raportimet për incidente dhe sulme sporadike në rajon vazhdojnë, duke përfshirë zona si Emiratet e Bashkuara Arabe, Kuvajti dhe objekte energjetike në jug të Iranit. Kjo ka ngritur pikëpyetje serioze mbi qëndrueshmërinë e marrëveshjes dhe rrezikun e një përshkallëzimi të ri të konfliktit.
Në këtë klimë të brishtë, vëmendja ndërkombëtare mbetet e përqendruar te zhvillimet në Ngushtica e Hormuzit, ku çdo incident mund të ketë pasoja të mëdha për ekonominë globale dhe sigurinë ndërkombëtare./K.C/dritare.net
